Europako funtsetatik hiru milioi euro gehiago jasoko ditu udalak
Oraingoan "emisio gutxiko guneak egiteko eta hiri garraioaren eraldaketa digitala eta eraginkorra gauzatzeko" baliatuko dute diru laguntza. Dagoeneko zenbait proiektu aurkeztu dituzte.
Besteak beste, San Juan plaza inguruko kaleak berrurbanizatzeko baliatuko dute laguntza. Espainiako Gobernuko Garraio, Mugikortasun eta Hiri Agenda Ministerioak gaur bertan jakinarazi duenez, “emisio gutxiko guneak egiteko eta hiri garraioaren eraldaketa digitala eta eraginkorra gauzatzeko “Europatik ia hiru milioi euro jasoko ditu Irunek, Next Generation EU programatik hain zuzen. Zehazki, 2.829.175,70 euroko laguntza jasoko du oraingo honetan udalak.
Jose Antonio Santano pozik agertu da albistearekin eta nabarmendu du “gure itxaropenak betetzen” ari direla. “Terma erromatarrak berreskuratzeko bi milioien ondoren, hirira iristen diren Europako funtsen berrespen
berri honek mugikortasun jasangarria sustatuko du, gure ustez hiriaren etorkizunerako funtsezkoak diren proiektuen bidez”, esan du.
Orain, ia hiru milioi euro horiek “garraio publikoa elektrifikatzen jarraitzeko (L-2 Katea-Erdialdea) eta emisio gutxiko guneak sortzeko” zein “funtsezko hiri-eragiketak egiteko” baliatuko dituztela jakinarazi du Santanok. Alkatearentzat, honekin, “jauzi kualitatiboa” emango du hiriak, “jasangarritasunaren ikuspegitik eta ingurumena errespetatuz”.
Ondorengo proiektuetara bideratuko dute laguntza (2023 urtean bukatzea aurreikusi dute):
- 2 linearako 4 autobus elektrikoa erostea: 2.800.000 €.
- San Juan plaza inguruko kaleak berrurbanizatzea: 627.046,36 €.
- Autobus elektrikoak kargatzeko sistema: 450.000,00 €.
- Ekipamendu ontziratua digitalizatzea eta modernizatzea: 342.000,00 €.
- Oinezkoen ardatzak hobetzea: 308.677,69 €.
- Santa Elena karrika berrurbanizatzea: 301.451,65 €.
