“PSE-EEk ezin du bere gobernukidearen aurrean besoak gurutzatuta jarraitu”
Ospitaleko bloke kirurgikoa birmoldatzeko proiektuaren harira, Elkarrekin Podemos-IUk "faltan" bota du proiektuaren kontrako "PSE-EEren jarrera argia, kontuan izanik EAJren gobernukide dela".
Nuño eta Soto, ospitaleko langileekin gaur. Elkarrekin Podemos-IU taldeak, Bidasoa Ospitaleko bloke kirurgikoa birmoldatzeko proiektuaren harira, PSE-EE taldearen jarrera salatu nahi izan dute, “faltan” bota baitute proiektuaren kontrako “PSE-EEren jarrera argia”, kontuan izanik EAJren gobernukide dela, “eta are gehiago Irunen Jose Antonio Santano sozialistak alkatetza duenean”.
Taldeko kide David Nuñok honakoa esan du: “Duela gutxi irakurri genuen Eneko Anduezak, euskal sozialisten buruak, EAJ gaitzetsi zuela lan-erreformari dagokionez, esanez eraztunak ez zitzaizkiola eroriko bere gobernukidea kritikatzeagatik. Bada, Bidasoako Ospitaleko obrei dagokionez, kaltetuok eskertuko genizueke gai honetan ere EAJren aurka agertzea”. Gai honetan bi alderdiek “erantzukizuna” dutela erantsi dute, eta gaineratu dute “PSE-EEk ezin duela besoak gurutzatuta jarraitu”.
Azkenik, beharrezkotzat jo dute sozialistek EAJri “presioa egitea obra geldiarazteko eta inplikatutako alde guztientzat irtenbide hobea aurkitzeko”.
