Irunen bizi diren emakumeek 'Gure artean' programan parte hartuko dute
Programaren helburua "emakumeen artean babes eta elkartasun sare bat sortzea eta Irunen bizi diren emakume atzerritarrak Irungo gizartean integratu daitezen bultzatzea" da. Bihar (hilak 17) egingo dute lehen saioa.
Irungo Udaleko Gizarte Ongizate sailak Gure artean izeneko programa sortu berri du, “emakumeen artean babes eta elkartasun sare bat sortzeko eta Irunen bizi diren emakume atzerritarrak Irungo gizartean integratu daitezen bultzatzeko” asmoz sortutakoa. Bihar (hilak 17) emango diote hasiera egitasmoari.
Emakume partaideek beren interes eta esperientzien berri emango diote elkarri. Horrez gain, hiriko ohiturak, kultura, baliabide eta zerbitzuak ezagutuko dituzte, eta azkenik, lanak eta prestakuntza ikastaroak jasoko dituzte. Gainera, behar izanez gero, gaztelaniazko mintzapraktikak egingo dituzte.
Partaideen ezaugarri eta beharren araberako talde ezberdinak osatuko dituzte. Goizez (ostiraletan, 10:00etatik 11:30era) eta arratsaldez (ostegunetan, 16:00etatik 17:30era). Ordu eta erdi iraungo dute saioek, eta abendura bitarte luzatuko dituzte.
