Holokaustoaren biktima irundarrak omendu dituzte
Nazien jazarpena pairatu zuten 27 irundarrak gogoratzeko bildu dira gaur Etorbidearen zubian. Bertan izan dira horietako batzuen senideak.
Etorbidearen zubia Holokaustoaren biktimak omentzeko agertoki izan da gaur. Bertan ekitaldia egin dute ordezkaritza duten talde guztiek, Holokaustoaren Biktimak Oroitzeko Nazioarteko Egunean. Lore eskaintza egin dute bertaratutakoek, eta Holokaustoaren Irungo biktimen familiei karpena bana eman diete, biktima izan zen senidearen dokumentazioarekin. International Center on Nazi Persecution zentrotik eskuratu du udalak informazio guzti hori eta orotara, 27 irundarren dokumentazioa jaso dute.
Politikariekin batera, bertan izan dira biktima batzuen senideak, tartean, Francisco Galvez Arias, Segundo Aranguren Arrizabalaga, Vicente Retegui Echevarria eta Victor Garcia-Serrano Retegui.
“Ekitaldi honen bidez, bidegabekeriarik ankerrenaren biktima horiek omendu nahi ditugu, bai eta familien ondoan egon ere, hala gaur etorri zaretenak nola ezin izan dutenak. Abenida zubia oroitzapen eta memoria puntua da gaur guretzat. Ez dugu memoria hori galdu behar, eta berreskuratu egin behar dugu, iraganeko akatsak eta izugarrikeriak saihesten jakiteko. Horretarako, udalak konpromisoa hartu du historiaren eta memoria demokratikoaren alde, biktimak omendu eta oroitzeko, gertatu zen guztiaren ezagutzan oinarrituta, memoria historikoko
bulegoaren bidez”, esan du gaurko ekitaldian Jose Antonio Santano alkateak.
