Ezker Anitza, langilearen heriotzaz: "Premiazko neurriak beharrezkoak dira"
Atzo hildako langilearen senide eta lagunei elkartasuna adierazi die taldeak, eta bide batez, zenbait kontu salatu nahi izan ditu.
Ezker Anitzak atzo goizean Irunen langile bat hil zela salatu nahi izan du. Haren senide eta lagunei elkartasuna adierazi die taldeak, eta bide batez, haren heriotza salatzeko antolatutako mobilizazioetan izango direla aurreratu dute. Herritarrak ere parte hartzera gonbidatu dituzte.
“Azken asteetan Euskadin izan diren lan istripuak enpresetan dagoen segurtasun eza agerian uzten dute, enpresen zein erakundeen aldetik berehalako neurriak beharrezkoak dira”, esan dute. Aurten jada bost langile hil direla gogoratu dute, eta “onartezintzat” jo dute egoera. “Langileok ezin gara egunero gure lanpostuetan bizia jokatzen ibili”, erantsi dute amorruz. Atzoko heriotzak, gainerako guztiekin, egungo neurriak “gutxiegi” direla erakutsi dutela uste dute. Horregatik, lan ikuskatzailetza handitzea exijitu dute, segurtasun neurriak bermatzen direla ikertu dezaten, “orain arte, ikusi den bezala, ez baita nahikoa izan”.
