Almudena Grandesen omenez, kale bat jartzeko eskatuko dute
Txingudiko Elkarte Feministak eta Nicolas Gerendiain elkarte errepublikanoak sartu dute mozioa, eta biharko plenoan eztabaidatuko dute.
Almudena Grandes Almudena Grandes idazlearen omenez, Irunen kale edo plaza esanguratsu bat eskaintzeko eskatuko dute biharko ohiko osoko bilkuran, “bere lanaren eta bizitza osoan defendatu zituen gizalegezko balioen
oroigarri”. Mozioa Txingudiko Elkarte Feministak eta Nicolas Gerendiain elkarte errepublikanoak sartu dute, bi elkarteetako batzordeetan hala onartu ondoren. Grandes, madrildarra, joan den azaroaren 27an hil zen.
Elkarteen arabera, Grandesek berak eta bere obrak “oso modu berezian” irudikatzen dituzte bi elkarteek partekatzen dituzten “balio zibiko, indibidual eta kolektibo jakin batzuk”. Halaber, horiek lotura dutela iritzi diote Irungo hiriak historian zehar irudikatu dituen balioekin ere.
“Balio errepublikano eta feministak irmo defendatzen borrokatu zirenen memoria historikoaz harro egotea; gizarte bidezkoagoa eta solidarioagoa lortzeko konpromiso politiko etengabea izatea; emakumeek historian eta gizartean duten funtsezko zeregina aldarrikatzea; koherentzia ideologikoa, moden eta norberaren interesen gainetik”, balio horiek aipatu dituzte elkarteek.
Horiek, gainera, “inoiz baino beharrezkoagoak” direla iritzi diote, populismoa eta eskuin muturra “mehatxu” bihurtu diren honetan, “atzera egin nahi dute ustez finkatuta zeuden gizabanakoen eskubideetan eta lorpen sozialetan”.
