Aurrekontuen gaineko elkarrizketak hasiko ditu udal gobernuak
82 milioi euroko aurrekontu proposamena aurkeztu du udalak, iaz baino %5,8 gehiago. Urtarrilaren 31ko osoko bilkuran onartuko dituzte.
Irungo Udalbatza, azaroko ohiko osoko bilkura. Aurrekontuen gaineko lanketa egiten ari dira azken asteetan udal taldeak, eta urtarrilaren 31ra arte udal gobernu taldearekin negoziatzen ibiliko dira zinegotziak. Udalak jakinarazi duenez, aste honetan hasiko dira negozioazio horiek.
Joan den ostegunean, hilak 13, amaitu zen aurrekontu orokorrari zuzenketak aurkezteko epea, eta prozedura abian da: urtarrilaren 31ko osoko bilkuran onartuko dituzte. Udalak jakinarazi duenez, udal taldeetatik 53 zuzenketa jaso dituzte.
Udal gobernu taldeak 82.081.176,45 euroko aurrekontu proiektua aurkeztu du. Hazi egin da iaztik: %5,8. Zerbitzu publikoen indartzea, langileen kontratazioak, gastu sozialaren igoera, eta 8,7 milioi euroko inbertsio blokea dira proiektuaren zutabe garrantzitsuenak, horien artean, Europako funtsetara aurkeztutako proiektuak.
“Jarrera kontruktiboa”
Ogasun Arloaren arabera, “jarrera konstruktiboz” helduko diete negoziazioei, eta proposamenak jaso eta onartzeko prest daudela aurreratu dute. Izan ere, pandemiari aurre egin eta talde kaltetuenei laguntzeko “ahaleginak” egin beharko dituztela iritzi dio. “Sigla politikoak alde batera utzi eta hiriak aurrera egiten jarratzeko adostasuna lortzen saiatu behar gara”, adierazi du Miguel Angel Paez Ogasun Arloko ordezkariak.
