Bidasoa-Txingudi Mugaz Gaindiko Partzuergoak urteko azken bilkura egin du
Irungo, Hondarribiko eta Hendaiako alkateak Irunen bildu dira; hainbat gai izan dituzte hizpide, tartean, 2022. urteko aurrekontua.
Partzuergoaren urteko azken bilkura.
Bidasoa-Txingudi Mugaz Gaindiko Partzuergoko agintariek urteko azken ohiko osoko bilkura egin zuten atzo goizean, Irungo udaletxean. Hendaiako Kotte Ezenarro, Hondarribiko Txomin Sagarzazu, eta Irungo Jose Antonio Santano alkateek parte hartu zuten bileran.
Agintariek hainbat gai izan zituzten hizpide urteko azken bilkuran, horien artean garrantzitsuena, 2022ko aurrekontuaren onarpena izan zelarik. Hala, datorren urterako aurreikusitako diru sailen artean ondokoak nabarmendu zituzten agintariek: garraio publikoa eta mugikortasuna sustatzeko, 15.600 euro; kulturaren sustapena, 43.000 euro; euskararen sustapena, 20.600 euro; kirolaren
sustapena, 40.000 euro; eta turismoaren arloko informazioa eta sustapena, 20.500 euro.
