Memoria Historikoaren legea ez betetzea egotzi dio Ezker Anitza-IUk udalari
Indarrean dagoen Memoria Historikoaren legeak Pedro Muguruzaren eta Francisco Sagarzazuren omenezko sinbologia eta izendapenak ezabatzera behartzen duela gogoratu du alderdiak.
Pedro Muguruzaren omenezko plaka.
Bidasoko Ezker Anitza-IUk Memoria Historikoaren legea ez betetzea leporatu dio Hondarribiko Udalari. Ezkerreko alderdiak gogor kritikatu du Hondarribiko Udalbatzak, EAJren eta PSE-EEren botoekin, Pedro Muguruza eta Francisco Sagarzazu frankisten izendapen bereziak eta omenezko sinbologia ez kentzeko hartutako erabakia. Taldeak gogoratu duenez, gaur egun indarrean dagoen 52/2007 Memoria Historikoaren legeak faxismoaren omenezko sinbologia eta bestelako oroigarri zein izendapenak bertan behera uztera derrigortzen du. Areago, lege berri baten zain egotea, dagoeneko legeak horretara behartzen duenean “ulergaitza” da alderdiarentzat. Memoria Historikoaren legea “ia 15 urtez” dagoela indarrean gogorarazi dio, halaber, Ezker Anitza-IUk udal gobernu jeltzaleari. Hori horrela, egoera honekin “bukatzera” eta Frankismoa “ez zuritzera” gonbidatu du ezkerreko alderdiak gobernu talde jeltzalea.
