Dena prest 2021. urteko Gabonetarako
Bihar egingo den San Tomas azokatik hasita urtarrilaren 9ra bitartean hamaika ekitaldi antolatu ditu udalak.
Aurtengo Gabonen nondik norakoak ezagutarazi dituzte.
Hastear dira 2021. urteko Gabonak. Hamaika dira Hondarribiko Udalak datozen bi asteetarako aurreikusitako ekitaldi eta jarduerak. Biharko San Tomas azokatik hasi, eta urtarrilaren 9ra bitartean luzatuko dira ospakizunak. Maria Serrano eta Juan Luis Silanes Merkataritza eta Kultura zinegotziek, hurrenez hurren, eman dituzte Gabonetako agendaren gaineko xehetasunak gaur goizean, udaletxean egindako agerraldian.
Lehenik eta behin, biharko San Tomas azoka formatu ezberdinean egingo dela zehaztu du Silanesek. Ez da jateko edo edateko aukerarik egongo, eta jende pilaketak sahieste aldera ez da animaliarik izango bertan. Hogei bat postuk beteko dute San Pedro kalean goizetik hasita. 16:00etan umeentzako jolasak egingo dituzte Arrantzale Auzoan, eta 18:30ean, Meakako Adixkideak taldearen dantza emanaldia egingo dute.
Hilaren 23an, bestalde, Olentzero eta Mari Domingiren txanda izango da. Iazko formatu berean egingo dute, Kasino Zaharreko lorategian 15:00etatik 20:15 arte. Sarrerak bihartik eskura daitezke Arma Plaza informazio gunean.
Errege Magoen postariari dagokionez, lau eremutan egingo dute aurtengoa: Amuten Anttoni Etxeberria plazan, Mendelun Planetak plazan, Portuan Arrantzale Auzoan, eta Alde Zaharrean Gipuzkoa plazan. Urtarrilak 4an izango da 17:00etatik 18:00etara Amuten eta Mendelun, eta 19:00etatik 20:00etara Alde Zaharrean eta Portuan.
Errege Magoek, iaz bezala, Jostaldin errepikatuko dute bisita hilaren 5ean, 15:00etatik 20:15 arte. Sarrerak hilaren 28tik aurrera eskura daitezke Arma Plazan.
Azkenik, Go!azen telesaileko kideek emanaldia eskainiko dutela urtarrilaren 6an, Itsas Etxea Auditoriumean, nabarmendu du Silanesek. Bi saio aurreikusi dituzte: lehena, 12:30ean, eta 16:00etan bigarrena. Sarrerak Arma Plazan salgai jarriko dituzte hilaren 26 eta 27an. Gehienez sei sarrera eskuratu ahal izango ditu pertsona bakoitzak.
Gabonetako egitaraua hamaika ikuskizun eta antzerkik biribilduko dute. Agenda osotasunean ikusteko sartu hemen.
