Ziztakak proposamen txosten bat landu, eta lankidetzarako bidea abiatu du
Proposamena garatzen aritu diren eragileekin, eta auzo elkarte eta udal alderdi desberdinetako ordezkariekin bildu nahi dute proposamena aurkezteko. Bitartean, kalera irtengo dira Kulturakada! dinamikarekin, kulturak espazio propio bat behar duela aldarrikatzeko.
Bi ikasturtez Ziztakaren asmoa zein den azaltzeko eta hiriko euskaltzale eta kulturgileekin harremanak estutzeko tartea hartu ostean, proposamen txosten bat garatu du taldeak. Orain, bi bide jorratuko dituztela azaldu dute, batetik, landutako idatzia aurkeztera doaz “hiriko eragile, auzo elkarte zein udal alderdiei”, eta bestetik, espazioaren beharra aldarrikatzen jarraituko dutela zehaztu dute.
Bada, hirugarren ikasturtea abiatu du kultura eta euskararen aldeko taldeak. Hasierako hipotesia sendotuta itzuli direla diote, eta txostenean bi ikasturte iraun duen prozesuan bildutako honako hau jaso dute: “Irunen Kafe Antzoki baten behar eta aukeren justifikazioa, eta proiektu hori lantzen jarraitzeko ezaugarri nagusiak aipatu, prozesuan ebatzi bezala”.
Berretsi egin dute Kafe Antzokia Irunentzako proiektu bat dela, “irundar guziei zabalik eta irundar guzien onura duena xede”, eta modu horretan planteatzen dutenez, “egokiena udalarekin kolaborazioan lan egitea dela” hasieratik uste izan dutela nabarmendu dute. Horregatik, mahai bat sortzea proposatu dute: “Mahai bat sortu behar dugu eta hor hasi eztabaidatzen egitasmoak zer nolako gorpuzkera izan behar duen”.
Idatzian, beraz, lankidetzarako proposamen zehatz bat irakur daitekeela aurreratu dute, eta Ziztakaren harreman taldeak, proposamen txostena partekatzeko erantzukizuna hartu du. Alegia, hiru talderi edota entitateri aurkeztu nahi diete, “euskara eta kultura ardatz izango dituen espazio horretara bidea” egiteko: Aurreko ikasturtean ehunduriko sareko eragileak, auzo elkarteak eta udalean ordezkaritza duten alderdiak.
KULTURAKADA!
Kulturak kalean tokia duelakoan daude, baina ez lukeela bakarrik bertan egon behar diote: “Kulturak espazioa behar du, espazio propioa. Euskarak ere bai”. Horregatik, kalera irtengo dira Kulturakada dinamikarekin, “gabezia horiek plazaratzeko”, erronkari aurre eginez. Oraingoz, urtarriletik apirilera beteko dituzte plazak, eta era askotariko kultur sorkuntzak landuko dituen egitaraua osatu dute: Urtarrilean, antzerkia; Otsailean, arte plastikoa; Martxoan, literatura; Apirilean, bertsolaritza eta musika.
Xehetasunak beraien sare sozialetan zabaltzen joango direla jakinarazi dute, @ziztaka_irun eta orrialde honetan.
