Hamahiru jaiotzek osatuko dute 2021eko ibilbidea
Ttopara Kultur Elkarteak, Hondarribiko Udalak eta Gipuzkoako Jaiotzazaleen Elkarteak elkarlanean antolatuta, herriko hamahiru establezimenduetan prestatu dituzte jaiotzak.
Hamahiru establezimenduk parte hartu dute; irudian, Paradorean kokatutakoa.
2021eko jaiotzen ibilbidea aurkeztu dute gaur goizean Ttopara Kultur Elkarteko Jose Mari Sanz ordezkariak, Hondarribiko Udaleko Juan Luis Silanes Kultur zinegotziak, Gipuzkoako Jaiotzazaleen Elkarteko Begoña Lamy eta Maria Castillo ordezkariek, eta Susana de la Rubia Paradoreko zuzendariak. Azken horretan burutu dute aurkezpena.
“Atsegin handiz aurkezten dizuegu II. Jaiotzen Ibilbidea, Hondarribiko merkataritza eta ostalaritza establezimendu ezberdinetan banatutako jaiotza artisauen erakusketa”, adierazi du Sanzek. Iaz egin bezala, aurten ere jaiotzak kalera ateratzea eta horiekin ibilbide bat osatzea erabaki du elkarteak. Udala eta jaiotzazaleen elkartea izan dute bidelagun horretarako Ttopara elkarteko kideek.
Denera, hamahiru jaiotzek osatuko dute 2021eko ibilbidea. Besteak beste, ondoko establezimenduetan ikus diatezke: Heme-Shop, Menina, ArmaPlaza interpretazio zentroa, Paradorea, Leiza, Pascua, Malentxo, Gaztelu, Joski, Papykop, Mar, Alzaga, eta Federopticos.
Silanesek bere aldetik nabarmendu duenez, Ttopara elkartearekin dinamika hau aurrera eramaten duen lehen aldia da. Asebete agertu dira elkarlanarekin antolatzaileek. De la Rubiak, bere aldetik, euskal munduari eskainitako jaiotzak sortu izana eskertu du. Jaiotzaleen elkarteko ordezkariak ere kontent agertu dira elkarlanarekin zein lortutako emaitzarekin. Gaurtik urtarrilaren 6ra arte bisita daitezke jaiotzak.
