Irun "Gabonetako hiriburu" izatea nahi dute
Gaur aurkeztu dute Gabonetako programazioa, eta ekitaldiz beteta dator. Jose Antonio Santano alkateak "Eguberrietako kanpaina handiena" dela esan du.
Gabonetako egitarauaren aurkezpena. Ekitaldiz betetako Gabonak izango dira aurten, Irunen. Gaur aurkeztu dute Eguberrietarako programa, Irun, zure Eguberrietako hiriburu lelopean. Izan ere, Jose Antonio Santano alkateak aurreratu duenez, Irunen izan den Eguberrietako kanpaina handiena da aurtengoa: “Oso hilabete gogorrak igaro ditugu, eta nahiz eta oraindik erne ibili behar dugun eta erantzukizunez jokatu, badakigu urteko garai hau oso garrantzitsua dela hiriko sektore askorentzat”.
Udalaz gain, hiriko zenbait eragilek ere parte hartu dute egitarauan, Bidashop, Mugan eta Danok Bat elkarteek, Ficobak eta aurten baita San Migel eta Alde Zaharra-San Juan auzo elkarteek ere. Juncal Eizagirre ordezkariak jakinarazi duenez, izotz pista, Eguberrietako azoka, txirrista eta kalea girotzeko emanaldiak izango dira Gabonetako egitarauaren ekitaldi nabarmenetakoak.
Ostiralean, hasiko dira motorrak berotzen, hiri osoan argiak pizteko ekitaldia egingo baitute, 18:00etatik aurrera, San Juan plaza inguruan. Bertan, Irungo Kontserbatorioko ikasleek gabon kanta batzuk kantatuko dituzte, eta alkatearekin batera, Elatzetako ikasleek piztuko dituzte argiak. Hain zuzen, argien aurrekontua %40 igoko da aurreko urteekin alderatuta.
Ostiralean ere Sarjia parkean, Eguberrietako herrixka zabalduko dute, eta urtarrilaren 9ra arte egongo da zabalik. Uranzu pilotalekuan, bestalde, hainbat ekitaldi egingo dituzte: hilaren 17an, errealite birtualeko saioa; hilaren 19an, mahai jokoak, Alde Zaharra-San Juan elkartearen eskutik; hilaren 20an, serigrafia saioa; hilaren 24an, erraldoien tailerra Bidasoko Erraldoiak elkartearen eskutik; hilaren 27an berriro serigrafia saioa, eta urtarrilaren 4ean gynkana eta zozketa Trikuharri elkartearen eskutik.
Larunbat honetan, berriz, bola erraldoi ibiltaria martxan jarriko dute. Bertan, argazkiak atera ahal izango dira, eta herriko merkataritza guneetan barrena ibiliko da txandaka: hilaren 4an Sarjia parkean; hilaren 11n, Pio XII plazan; hilaren 17an, Palmera Monteron; hilaren 19an, turismo bulegoaren ondoan; urtarrilaren 3an, San Migelen; eta urtarrilaren 4ean, San Juanen.
Izotz pista, berriz, hilaren 10ean zabalduko dute. Inoizko izotz pistarik handiena izango da, 200 metro koadrokoa, eta lehen aldiz Ficobaren kanpoaldean egongo da, urtarrilaren 16ra arte. Gainera, doako autobus bat jarrik odute erdialdea eta Ficoba lotzeko. Egun batzuetan, asteburuetan eta jaiegun bezpera eta jaiegunetan, goiz eta arratsaldez egongo da zabalik 11:00etatik 14:00etara eta 17:00etatik 20:00etara; eta astelehenetik ostiralera, oro har, arratsaldez bakarrik 17:00etatik 20:00etara. Abenduaren 20an itxita egongo da. 13 urtetik beherakoek 2 euro ordaindu beharko dituzte; eta hortik gorako guztiek 3 euro. 5 sarrerako bonoak egongo dira: txikientzat 8 euroan, eta helduagoentzat 12 euroan.
Eguberrietako azoka
Egitarauaren beste indargune bat Eguberrietako azoka izango da. Hilaren 17tik abenduaren 31ra arte egongo da irekita (hilaren 25ean itxita egongo da). Zabaltza plazan jarriko dute, honako ordutegian: 11:00etatik 13:30era eta 16:30etik 20:00etara. Inoiz baino etxola gehiago egongo dira, hogei.
Merkataritzarekin lotuta, hiriko hamar establezimenduetako erakusleihoetan, Ipuinetako Erakusleihoak jarriko dituzte, eta QR kode batekin aktibatuta, erakusleiho robotizatuak sortuko dituzte.
Egun berean zabalduko dute txirrista erraldoia ere, eta Pio XII plazan egongo da, urtarrilaren 9ra arte. Kasu honetan, prezioa euro batekoa izango da, eta izotz pistarako sarrera konbinatua lortzeko aukera izango da, 2,50 euro 13 urtetik beherako haurren kasuan, eta 3,50 gainontzekoentzat. Hilaren 17, 20, 21, 22 eta 23an arratsaldez bakarrik egongo da irekita, 17:00etatik 20:00etara, eta gainontzeko egunetan, goiz eta arratsaldez, 12:00etatik 14:00etara eta 17:00etatik 20:00etara. Hilaren 25ean eta urtarrilaren 1ean itxita egongo da.
Kale animazioa
Kaleak animatzeko hamabi jarduera prestatu dituzte: kalejirak, kontzertuak, DJ saioak eta txarangak. Hona hemen egitaraua:
- Hilak 4: Los Perolas txaranga, 18:30ean, Pio XII plazan.
- Hilak 10: Josu Rodriguez DJa, 19:00etan, izotz pistan eta Peña Poteo, San Migel auzotik San Juanera.
- Hilak 11: Tango argentinarrak, 11:30ean, Zabaltza plazan. Markelin DJ, 18:00etan, izotz pistan. Demodet Quartet, 20:30ean, Zabaltza plazan. Santiagoko Deabruak-en kalejira, 19:00etan, Iparralde hiribidetik Zabaltza plazara.
- Hilak 17: San Vicente de Pauleko majoretak. 18:30etik aurrera, San Migeletik Luis Marianora.
- Hilak 18: Irungo Atsegiña txaranga, 12:00etan, Behobian. Burrunba Elektroparatxaranga, 19:00etan, Luis Marianotik San Juan plazara.
- Hilak 19: Ondare elkartearen erraldoiak, 12:00etan, Colon ibilbidean. Dantza akademien emanaldia, 11:30ean.
- Hilak 29: Rock ikuskizuna, 19:00etan, kaleetan.
- Hilak 30: Oihan Vega DJ, 18:00etan, izotz pistan
