Guadalupen pistola batekin agertutako gizona Irunen atxilotu du Ertzaintzak
Bi herritarri eta Hondarribiko Udaltzaingoari oldartu zitzaien; bilaketa dispositiboa Jaizkibelen abiatu arren, Irungo Zubia zentroan atzeman dute azkenean.
Ertzaintzak pistola bat zuen gizon bat atxilotu du.
Ertzaintzak Irungo Zubia zentroan atxilotu zuen atzo arratsaldean Guadalupeko inguruetan pistola batekin zebilen gizona, Segurtasun Sailak ezagutarazi duenez. Bi herritarri eta Hondarribiko Udaltzaingoaren bi agenteri oldartu zitzaien arma batekin Guadalupen. Ertzaintzaren arabera, mendi aldera abiatuz udaltzainetatik ihes egitea lortu zuen asteazkenean, gaueko 21:00ak inguruan.
Bilaketa dispositiboa abiatu zuen asteazken gauean bertan Ertzaintzak. Gizonaren arrastoak aurkitu arren, ez zuten hura atzematea lortu. Atzo eguerdian, hala ere, larrialdi zerbitzuek artatutako gizon baten abisua jaso zuten ertzainek. Itxuraz, gaua mendian eman ondoren urradurak eta hipotermia sintomak zituen.
Zabaldutako informazioaren arabera, Gurutze Gorritik Irungo Zubia zentrora eraman zuten larrialdi zerbitzuek gizona. Ertzaintza bertaratu zenean Guadalupeko gizon bera zela konprobatu zuen, baita, pistola bat zeramala ere. Mehatxu delitua leporatuta atxilo eraman zuten azkenean.
