Dagoeneko aurkez daitezke proiektuak Irun Ekintzan sarietarako
Zazpigarren aldiz jarri dute martxan enpresa eta autonomoak saritzeko lehiaketa. Otsailean egingo dute sari banaketa, aurrez aurre oraingoan.
Irun Ekintzan sariak martxan dira berriro, eta dagoeneko ireki dute proiektuak aurkezteko epea. Hilaren 30era arte luzatuko da. “Ekintzaile kultura” aitortzeko helburua du ekimenak, eta hiriko enpresa eta autonomoen proiektuak sarituko ditu.
Zazpigarren edizioan aurrez aurreko sari banaketa berreskuratzea espero du udalak. Hori otsailean izango da. Miguel Angel Perez ordezkariaren arabera, pandemiaren hilabete gogorrena atzean utzita, ekitaldi hori elkar ikusteaz gain, enpresa eta autonomoei egin behar izan duten lana aitortzeko baliatuko dute: “Ederki egokitu dira koronabirusak ekarritako erronkari, eta ez dugu ahaztu behar krisiak gogor kolatu dituela ehun ekonomikoa eta enpresa ekimen asko eta asko”.
Urtero bezala, lau kategoria izango dira: Berrikuntzaren Irun Ekintzan saria 20 langile baino gehiagoko Irungo enpresentzat (4.000 euro), Berrikuntzaren Irun Ekintzan saria 20 langile baino gutxiago Irungo enpresentzat (4.000 euro), Berrikuntzaren Irun Ekintzan saria Irungo zerbitzu enpresentzat (4.000 euro) eta Ideia berritzaile onenaren Irun Ekintzan saria (2.000 euro).
Enpresek, besteak beste, honako baldintza hauek bete beharko dituzte: proiektu berritzaile bat abian jarri izan da edo abian jartzeko asmoa izatea eta 2020 eta 2021ean egoitza nagusia edota lan zentro bat Irunen izatea.
Hautagaitzak irun.org helbideko egoitza elektronikoan aurkeztu beharko dira. Inprimakiak ere bertatik jaitsi daitezke. Informazio gehiago, 943 50 53 36 telefono zenbakian.
Epaimahaia
Epaimahaia adituek osatuta egongo da:
- Marisa Arriola BIC Gipuzkoa Gipuzkoako Enpresa eta Berrikuntza Zentroko gerentea
- Jose Miguel Aierza ADEGI Gipuzkoako enpresarien elkarteko zuzendari nagusia.
- Luis Manero Lopez Innobasque, Berrikuntzaren Euskal Agentziako Enpresa Berrikuntzako zuzendaria.
- Pierre Odriozola Chez Sokoako zuzendari nagusia.
- Alvaro de la Rica Aspiunza Deustoko Unibertsitateko Ekonomia eta Enpresa Zientzien Fakultateko dekanoa.
- Lander Beloki Mondragon Unibertsitateko Enpresa Zientzien Fakultateko dekanoa.
- Ana Beraza EHUren Gipuzkoako Campuseko Ekonomia eta Enpresa Fakultateko dekanorde koordinatzailea.