Irungo Sortuk Herri Topaketak egingo ditu hilaren 27an
Ezker abertzaleko komunitatea elkartzea da topaketen asmoa, "ezker abertzaleak aurrera begira Irunen dituen erronkei buruz elkarrekin hausnartu eta eztabaidatzeko". Sei gai nagusi landuko dituzte.
Joan den ekainean abiatutako Loratzen prozesuaren baitan, Irungo Sortuk Herri Topaketak egingo ditu datorren hilaren 27an (larunbata da), Palmera Montero Gunean hain zuzen. Topaketen asmoa “Irungo ezker abertzaleko komunitatea elkartzea” dela azaldu dute antolatzaileek, “ezker abertzaleak aurrera begira Irunen dituen erronkei buruz elkarrekin hausnartu eta eztabaidatzeko”. Sei gai landuko dituzte, honakoak: euskalgintza, feminismoa, hezkuntza, lan eta bizi baldintzak, komunikazioa eta Hazia.
Topaketak biribiltzeko bazkari bat egingo dute saioen ostean. Topaketak 10:00etatik 14:00etara luzatuko dituzte.
Sortuko kideek ezker abertzalea osatzen duten kide ororen iritzi eta hausnarketak “ezinbestekotzat” jo dituzte, hortaz, ahalik eta jende gehien elkartu nahi dute. Bertaratzeko interesa dutenek helbide honetara idatzita eman beharko dute izena. “Batzuek bidea ireki bazuten, guri garaipena prestatzea tokatzen zaigulako. Komunitateaz, zaintzaz eta antolakuntzaz. Batu borrokara!”, erantsi dute.
