Arbes-Palmera Montero eta Belaskoeneako TAO eremu berrien irekiera atzeratu du udalak
Azken egunetako eguraldi txarragatik ezin izan dituzte eremu berriak margotzeko lanak amaitu. Astelehenean indarrean sartzea aurreikusi zuten: "espero dugu dena prest egotea laster".
Borja Olazabal, gaurko agerraldian. Joan den astean jakinarazi zuen udalak hilaren 8tik aurrera (astelehena da) TAO gune berriak zabalduko dituztela Arbes-Palmera Montero eta Belaskoenea auzoan. Ondorioz, TAO sistemaren barruan ez dauden eremuak TAO gune bihurtuko dira.
Dena den, azken egunetako eguraldi txarra dela eta, udalak jakinarazi du ezin izan dituztela garaiz amaitu eremu berriak margotzeko lanak, beraz, ezingo dutela indarrean jarri TAO zerbitzua bertan.
“Datorren astean, eguraldia lagun, pintaketa lanekin aurrera jarraituko dugu, eta espero dugu dena prest egotea laster. Edozein kasutan ere, aldez aurretik baieztatuko da zein egunetan hasiko den martxan”, diote udaleko iturriek.
