Elkarrekin Podemos: "Elkarrizketarekin dugun konpromisoa berretsi nahi izan dugu"
Udal taldearen ordezkariek parte hartu dute ETAren jarduera armatuaren etetearen 10. urteurrena dela-eta 43-2 antzerki konpainiak egindako saioetan.
Proyecto 43-2ren 'Rescoldos de paz y violencia' obraren kartela. Atzo bete ziren 10 urte ETAk jarduera armatua utzi zuenetik, eta testuinguru horretan, Irunen 43-2 konpainiaren eskutik hainbat saio egiten ari dira. Elkarrekin Podemos Ezker Anitza-IU udal taldeak jarduera horietan parte hartu duela jakinarazi du. Horrekin, “elkarrizketarekin dugun konpromisoa berretsi” nahi dutela adierazi du.
Udal taldearen iritziz, oso garrantzitsua da jarduera horietan parte hartzea, eta, ildo horretatik, “Euskal Herrian dauden errealitate ezberdinen eztabaida eta hurbilketa erraztuko duten kultura-, gizarte- eta politika-guneak eraikitzean” sinisten dutela gaineratu du.
