Estimulazio kognitiborako tailerrak, asteartero, Mendelun
Adineko pertsonei zuzenduta daude tailerrak, eta iazko arrakasta ikusirik, aurten berriz ere horiek martxan jartzea erabaki dute.
Adineko pertsonentzako estimulazio kognitiborako tailerrak abiatu dituzte.
Adineko pertsonei zuzendutako estimulazio kognitiborako tailerrak antolatu dituzte Mendeluko lokal sozialean, asteartero, 16:30etik 18:00ak bitartean. Iazko esperientziaren «arrakasta» aintzat hartuta –34 lagunek parte hartu zuten–, aurten berriro tailerrari heltzea erabaki dutela ezagutarazi dute Asun Gamindez Mendelu auzo elkarteko idazkariak, Marieta Vicente Gizaguneko dinamizatzaileak eta Gotzone Larrarte Gizarte Zerbitzuetako zinegotziak.
Iazko esperientzia pilotutik aurtengora proiektua «handituz» joan dela-eta laguntza eskatu dio bizilagunen elkarteak Hondarribiko Udalari eta beraz, aurrerantzean tokiko administrazioaren esku geratuko da inbertsioa. Areago, beste auzo batzuetara zabaltzea aztertzen ari direla gaineratu zuen Larrartek.
Tailerrean parte hartzeko interesa duten lagunek lokal sozialera jo beharko dute asteartero, 16:30ean.
