Miramon Parke Teknologikoa Hondarribira zabaltzea proposatu du gobernu taldeak
Txomin Sagarzazu alkateak Eusko Jaurlaritzako eta aldundiko ordezkariei helarazi die proposamena; orain dela hamarkada bateko eskaria da Miramongoa.
Miramon Parke Teknologikoa Zubietara zabaldu nahi du udal gobernuak.
Hondarribiko Udalak ezagutarazi duenez, Miramon Parke Teknologikoa Zubietako lursailera zabaltzeko eskaria helarazi die Txomin Sagarzazu alkateak Markel Olano Gipuzkoako diputatu nagusiari, Arantxa Tapia Ekonomiaren Garapen, Jasangarritasun eta Ingurumen sailburuari, Jabier Larrañaga Ekonomia Sustatzeko foru diputatuari eta Itziar Epalza Euskadiko Parke Teknologikoen Sareko zuzendariari. Iragan ostiralean egin zuten ordezkariek gaiaren inguruko bilkura udaletxeko areto nagusian. Proposamena “zehatzago” aztertzeko konpromisoa hartu zuten inplikatuek, udalak zabaldu duenez.
Miramon Zubietara hedatzea orain dela hamarkada bateko eskaria dela gogoratu zuten parte hartzaileek bileran. Sagarzazuren arabera, “Gipuzkoako parke teknologikoa osatzen duten erakundeek duela ia
hamarkada inguru bertako eremu batean jarduteko apustua egin zuten, nahiz eta krisi ekonomikoak eta
kudeaketa urbanistikoaren zailtasunek aurrera egitea eragotzi zuten. Kasu honetan, hedadura gutxiagoko
eta ez hain intentsiboa izango den esku hartzea da proposatutakoa, eta honek ere hiru erakundeen inplikazio ekonomikoa eskatuko luke”.
