Itsasoa non hasten den kontzientzia pizteko
Recicla Birziklatu elkarteak bultzatuta, Txingudiko Zerbitzuak-ek Irungo eta Hondarribiko udalen bitartez, 'Itsasoa hemen hasten da' kanpaina abiatu du.
‘Itsasoa hemen hasten da’ kanpaina.
Itsasoa hemen hasten da, mesedez, ez bota ezer lelopeko kanpaina abiatu du Txingudiko Zerbitzuak-ek Irungo eta Hondarribiko udalekin elkarlanean. Mundu osoan martxan dagoen dinamika da, eta Irungo Recicla Birziklatu elkarteak bultzatuta erabaki dute bertan garatzea. Estolderia-zuloetatik itsasoratutako hondakinek eragindako kalteez ohartarazi nahi dute kanpainaren bitartez. Atzo aurkeztu zuten kanpaina Irunen eta Hondarribian.
“Estolda-zulo ezberdinetan jarriko dira plakak, eta joan-etorri handieneko eremuei lehentasuna emango zaie, hala nola oinezkoentzako guneei, ikastexeetako irteerei, aisialdi zentroei… horiek baitira gatazkatsuenak”, adierazi zuen Leire Zubitur Txinzer-eko kudeatzaileak.
Estoldak zakarrontziak ez direla kontzientziatzeko, eta itsasoko habitateek jasandako kutsaduraz ohartarazteko helburua du dinamikak. Zigarro puntak direla hustubideetatik itsasoratutako hondakinik nagusiena nabarmendu zuen Zubiturrek.
