Eskifaia Txikik ate irekien jardunaldia egingo du bihar
Entseatzeko aretoa ezagutzea eta koruan parte hartu nahi dutenen artean ordutegiak hitzartzea dira hitzorduaren helburuak.
Eskifaia Txiki koruak haurrei eta haien gurasoei zuzendutako ate irekien jardunaldia antolatu du biharko, Aritz Enparan zuzendari berriak jakinarazi duenez. Jostaldi pilotalekuaren albo batean dago entsegu aretoa, eta 17:30ean finkatu dute horretarako hitzordua.
Jardunaldiak helburu bikoitza duela azaldu du arduradunak: “Batetik, ateak irekitzea, lokalaren barnealdea ezagutzea, zer den ikustea, eta lanketa horiek non egingo ditugun jakitea; eta bestetik, eta bereziki, agendak uztartzea eta zein egun eta ordutegi izan daitezkeen onenak aztertzea”. Ildo horretan, “datorren astean martxan jartzea” dela xedea adierazi du, nahiz eta eskolaz kanpoko jarduera gehienak martxan direla jakitun den.
Hori horrela, biharko hitzordura hurbildu ezin diren lagunei datorren astean gerturatzera gonbidatu dituzte. Informazio gehiagorako posta elektronikora ere jo dezakete interesdunek.
