Mintzalaguna egitasmoan izena emateko epea zabaldu dute jada
Mintzalaguna egitasmoaren aukera ezberdinak ezagutzera eta 'MintzaPoza' praktikatzera deitu ditu Euskaltzaleen Topaguneak hondarribiarrak.
2021-2022 ikasturteko Mintzalaguna egitasmoa martxan da dagoeneko.
2021-2022 ikasturteko Mintzalaguna egitasmoan izena eman daitekeela dagoeneko jakinarazi du Hondarribiko Udalak ohar baten bidez. Euskaltzaleen Topaguneak bultzatutako programak euskaraz mintza praktika egiteko aukera ezberdinak eskaintzen ditu MintzaPoza oinarritzat hartuta.
Koronabirusaren ondorioz iaz bizitako zailtasunen ondotik, «betikora itzultzeko gogoz» daudela berretsi dute antolatzaileek, «taldekideekin berriz ere elkartzeko eta MintzaPoza elkarrekin praktikatzeko. Horixe baita, finean, gure egitasmoen oinarria: MintzaPoza».
Gogorarazi dutenez, bidelagunak «ezinbestekoak» dira Mintzalagun programan. Areago, «probatu duten guztiek diote ematen dutena baino gehiago jasotzen dutela», erantsi dute. Hortaz, bidelagun gisa izena ematera ere animatu dituzte herritarrak, «haien ekarpenari esker euskaraz aritzeko aukerak sortzen dituztelako».
Euskaltzaleen Topagunearen webgunearen bitartez eman dezakete izena interesdunek. Hondarribiko Udalak jakinarazi duenez, bestalde, urriaren 2an larunbatarekin, San Pedro kalean karpa bat jarriko dute interesdunek izena eman dezaten. Karpa 11:00etatik 13:00ak bitartean egongo da zabalik. Informazio gehiagorako 688 86 53 98 edo 943 11 12 24 telefono zenbakietara dei daiteke.
