Minbiziaren inguruko 'Galdutako zaporea' programan parte hartu du Gran Solek
Mikel Muñoz eta Iñigo Tizon ordezkariak Madrilen garatutako ikerketan izan dira; minbiziaren aurkako tratamenduen ondorioz dastamena galdu duten pazienteak dira programaren ardatza.
‘Galdutako zaporea’ izenpeko programan izan dira Gran Soleko ordezkariak.
MD Anderson Cancer Center Houston-Madrid fundazioak bultzatutako Galdutako zaporea ikerketa programan parte hartu dute Gran Sol tabernako Mikel Muñoz eta Iñigo Tizon ordezkariek. Hala jakinarazi du gaur goizean Hondarribiko Ostalaritza Elkarteak ohar baten bidez. Zabaldutako informazioaren arabera, minbiziaren aurkako tratamenduen ondorioz dastamena galdu duten pazienteekin lan egiten du programak. Gaixoek zapore ezberdinak berreskuratzeko helburuarekin aurrera eraman dute ikerketa.
Krabarroka pastela, Dilista eta foie-gras kaputxinoa, eta Txangurro briochea estragoi maionesarekin izenpeko pintxoekin parte hartu dute ordezkari hondarribiarrek ikerketan. Hiru pintxoak lau pazienteren beharren eta gabezien arabera diseinatu eta ekoitzi dituzte Muñozek eta Tizonek.
Bertan bildutako bizipenak Miniature Social Experience izenpeko pintxo kongresuan partekatuko dituzte hondarribiarrek urriaren 15ean, Gasteizen.
