Gorostiak prest dira familiek jasotzeko
2020an jaiotako irundar bakoitzak gorosti bana izango du. Irailaren 25ean banatuko dituzte udaletxeko arkupeetan.
Gorostiarekin batera liburua jasoko dute familiek. Usadioari jarraituz, 2020an jaiotako irundar bakoitzari gorosti bana emango dio udalak, “elkarrekin hazteko” helburuarekin. Aurretik, gurasoek izena eman behar izan dute, eta, hilaren 25ean (larunbata), zuhaitzak udaletxeko arkupeetan jasoko dituzte.
Datozen egunetan familiekin harremanetan jarriko dira gorostia zein ordutan jaso behar duten zehazteko. Horri lotuta, zein osasun neurri bete behar diren azaldu du udalak: maskara uneoro jantzita eraman beharko da, eta familia unitate bakoitzaren arteko distantzia mantendu beharko da. Gainera, haur bakoitzaren laguntzaileak bi pertsonatara mugatu dituzte. Gel hidroalkoholikoa eskuragarri izango dela gaineratu du udalak.
Gorostia eta liburua
Udalak gorostiaren alde egiteko zein irizpide erabili dituen ere azaldu du. Hala, erraz egokitzen den espeziea dela esan du, eta ingurumenagatik nahiz arrazoi estetiko eta praktikoengatik “aukera egokia” dela.
Gorostiarekin batera, ipuina jasoko dute familiek, haur baten eta gorosti baten istorioa kontatzen duena. Bien arteko harremana kontatzen da, baita haurrak egiten dituen gogoetak ere.
