Ekitaldi kulturalak, bereziak diren egun hauetarako
Antzerkia, musika, zinema eta dantzaz gozatu ahal izango du asteburuan Hondarribira hurbiltzen denak. "Ez jaietan" ere eskaintza zabala programatu dute.
Good Sex, Maritxu antzezlaneko une bat Hondarribiko jaiek hartzen dituzten datetan gaude, baina pandemiak behartuta ohikoak diren ekitaldiak bertan behera utzi dituzte eta berriak sortu. Asteburu honetan antzerkiaz, musikaz, zinemaz eta dantzaz gozatu ahal izango da.
Gaur arratsaldean, hilak 10, Good Sex, Maritxu antzerki obra erakutsiko dute: 19:00etan Kasino Zaharrean. Sarrerek 2 euroko prezioa dute eta online erosi ahalko dira edo, bi ordu lehenago hurreratuz gero, Arma Plazako leihatilan.
Bihar, hilak 11, Txomin Artola Incarnatus Est izenburua jarri dioten kontzertua egongo da leku berean, arratseko 20:00etan. 10 euro balio du eta 18 urtetik beherakoentzat 6 euro. Sarrerak online hartu ahal izango dira edo eta Arma Plazako leihatilan. Ordu horretan, 20:00etan, zinemara joateko aukeraketa egin dezake Maya erlea, urrezko esfera filma ikusi nahi duenak. 2 euroko kostua dauka ekitaldi honek eta sarrera online eskuratzeko aukera dago edo baita bi ordu lehenago Arma Plazara hurbilduta ere. Saioa Soroetako pilotalekuan izango da.
Eta asteburua bukatzeko, Mutxikoak dantzatu ahalko dira Baluartean, arratsaldeko 17:ooetatik aurrera, doan.
