COVID-19aren eraginez hurbileko norbait hil zaienentzako laguntza taldea sortu dute
Dolurako laguntza zerbitzu honetan "emozioak adierazteko eta esperientzia eta bizipenak partekatzeko gune seguru bat" sortu nahi dute, eta horretarako bi terapeuta ariko dira gidari gisa.
Irungo Udalak laguntza talde berri bat osatu du, COVID-19aren eraginez hurbileko senide edo lagun bat hil zaienei laguntza psikologikoa emateko. Doakoa izango da zerbitzua, eta interesa dutenek hilaren 19era bitarte izango dute apuntatzeko aukera.
Dolurako laguntza zerbitzu honen helburua, udalaren arabera, “emozioak adierazteko eta esperientzia eta bizipenak partekatzeko gune seguru bat sortzea” da, eta horretarako bi terapeuta ariko dira gidari gisa. Saioak taldekakoak izango dira (hamar lagun gehienez) eta 2022ko ekainera bitarte luzatuko dituzte. Asteazkenetan bilduko dira, Palmera Monteron, 19:00etatik 20:30era.
David Nuño ordezkariaren arabera, egitasmoak «beti beharrezkoa den espazio baten sorrera ekarriko du, eta are gehiago egungo egoeran. Pandemiak min handia ekarri die gertukoak galdu dituzten guztiei, eta uste dugu tresna bat eskaini behar zaiela COVID-19ak modu horretan kolpatutako guztiei».
Taldean parte hartzeko esteka honetan izena eman beharko da.
