Irun Hiria literatura sarien irabazlen berri emango dute larunbatean
Lehiaketaren 44. aldi honetan inoizko parte hartzerik handiena izan da: 1.675 lan aurkeztu dira; horietatik 36 euskarazko eleberrian eta 25 euskarazko poesian.
Irun Hiria Literatura Sariak. Irudian, garaikurra. Larunbatean jakingo da zeintzuk izan diren 44. Irun Hiria literatura lehiaketako irabazleak. Lau saridun izango dira, guztira, bi kategoria izango baitira, eleberria eta olerkia, eta bi hizkuntzatan, euskaraz eta gaztelaniaz.
Aurten 44. aldia beteko du lehiaketak, parte hartze handiena izan duena. Guztira, 1.675 lan aurkeztu dira, iaz baino 1.103 lan gehiago, Kutxa Fundazioak jakinarazi duenez. Hazkunde hori pandemiari lotuta dagoela iritzi dio, izurritearekin batera, idazteari ekin diotelako askok. Argitaletxeek ere joera bera nabaritu dute. Partaidetzarekin lotuta dator ere parte hartzeko prozeduran izandako aldaketa; aurten, lehenengoz, digitalki egin ahal izan da, eta atzerritik lan asko jaso dituzte.
Kopuru horretatik euskaraz jasotako lanak gutxiengoa izan dira: 36 eleberrian, eta 25 olerkian; 61, orotara. Gaztelaniaz, berriz, 1.614: 975 eleberri eta 643 olerki.
Antonio Colinasi omenaldia
Larunbateko ekitaldian Antonio Colinas omenduko dute. Bera izan zen lehen Irun Hiria literatur sariko gaztelaniazko olerki kategoriako irabazlea 1970ean, eta orduz geroztik epaimahaiko kide izan da.
Colinas poeta, nobelagilea, saiogilea eta itzultzailea da, eta askotariko lanak argitaratu ditu. 1982an Espainiako Literatura Saria irabazi zuen.
Larunbateko ekitaldia 13:00etan hasiko da, udaletxean. Sariak, ordea, azaroaren 26an banatuko dituzte, Amaia KZn.
Epaimahai entzutetsua
Lau saridunak aukeratzeko launa epaimahai osatu dira, eta idazle edo kultur arloko jende entzutetsuak daude tartean: euskarazko eleberrian, Felipe Juaristi, Jon Martin, Joxe Mari Iturralde, Arantxa Urretabizkaia eta Jon Kortazar. Euskarazko poesian, berriz, Lourdes Otaegi, Iñaki Aldekoa eta Itxaro Borda.
Gaztelaniazko ataletan, berriz, Fernando Marias, Luisa Etxenike, Manuel Vilas, Patricia Esteban eta Jon Bilbao, eleberrian eta Manuel Rico, Antonio Colinas eta Raquel Lanseros, olerkian.
