EH Bildu: "Herriko jaiak herrira bueltatzeko lan egin behar dugu, beste herri askotan egin bezala"
Eskerrak eman dizkio EH Bilduk, duela 25 urte "pertsona direla aldarrikatu eta inor baztertu edo kendu gabe haien tokia hartzen saiatu zirenei". Emakume talde honen argazkia udaletxeko areto nagusian jarri dute "etorkizuneko belaunaldien eredua" direlako.
Areto nagusian jarri dute lehen aldiz desfilatu zuten emakumeen argazkia. Jaizkibel Konpainiaren 25. urteurrena betetzen da gaurkoan, eta EH Bilduk “esker ona” adierazi die Hondarribian “pertsona direla aldarrikatu eta inor baztertu edo kendu gabe haien tokia hartzen saiatu zirenei”. Parekidetasunaren aldeko borroka hau alderatu egin dute 1955ean Rosa Parksek Alabamako autobus baten eserlekua hartu zuenekoarekin edo 1967ean Kathrine Switzerrek Bostongo maratoian sartu zenekoarekin.
Belaunaldi berri bat, 25 urtean behin munduratzen dela dio koalizioak, “Hondarribira ere” zehaztu dute. Azken belaunaldiek ez dutela herriko jaiak “bakean eta berdintasunean bizitzeko” aukerarik izan eta “arazoa konpontzeko ardura instituzioena” dela “argi” ikusten dutela azaldu dute: “Herriko jaiak herrira bueltatzeko lan egin behar dugu, beste herri askotan egin bezala”.
Izan ere, EH Bilduren ustez “arazoa udalak sortu zuen” eta horretarako “legeari iskin” egin ziotela azaldu dute, eta alderdiak dio, ondorioz, herriko jaiak “esku pribatuetan” geratu zirela. Konponbidea udalak eman behar duela aldarrikatu dute, “denen artean gure festak ospa ditzagun”.
Udaleko areto nagusian, lehen aldiz Alardean sartu ziren emakumeen argazkia jarri du alderdiak: “Etorkizuneko belaunaldien eredua zarete, horregatik jarri nahi izan zaituztegu merezi duzuen tokian”.
