Hondarribia ohorezko txandan arituko da, Kontxako banderagatik borrokan
Hiru segundoko zigorra izango dute gizonezkoek amaierako denboran, semaforoa berdea jarri baino lehen atera direla erabaki dutelako epaileek. Hala ere, lehen postua irabazi dute gaurko jardunaldian. Emakumeek ohorezko txandan jokatzeko txartela lortu dute.
Hondarribiak denborarik onena egin du gizonezkoen kategorian. Argazkia: HITZA Gaur, Kontxako banderaren lehen jardunaldiak jokatu dira eta datorren igandean izango diren estropadekin jakingo da, nortzuk izango diren txapeldunak. Gaurkoan Arraun Lagunak izan da marka onena egin duen emakumeen eskifaia eta Hondarribia gizonezkoetan.
Emakumeen estropadetan, bigarren txandan atera da Hondarribia, Arraun Lagunak, Hibaika eta Chapelarekin batera. Lehen txandan markarik hoberena Oriok egin du, 10:33,26ko denborarekin, baina, ETE Ligako txapeldunek –Arraun Lagunak– hautsi dute marka hori bigarren txandan, 10:31,62rekin. Beraz, estropadako denborarik hoberena ezarri dute, Oriori 2 segundo gehiagoko tartea aterata. Ama Guadalupekoa 10:44,82ko markarekin laugarren izan da sailkapen nagusian, horregatik, ohorezko txandan egoteko txartela eskuratu du Arraun Lagunak, Orio eta Donostiarrarekin batera.
Gizonezkoen lehen txandan aritu dira Donostiarra, Urdaibai, Hondarribia eta Zierbena. Ama Guadalupekoa semaforoa berdea jarri baino lehen atera dela ebatzi dute epaileek, eta amaierako denborari 3 segundo gehiagoko zigorra jartzea ebatzi dute. Orduan, estropadarekin hasi dira eta lehen ziabogan denborarik onena egin du Hondarribiak 9:24rekin. Distantzia areagotzen joan dira bigarren luzean, eta azkenean, berdeak izan dira lehenak –zigorra erantsita– 19:06,86rekin, atzetik sartu da Zierbena 7 segundo beranduago (19:10,28).
Bigarren txandan, kaleak hartu dituzte Orio, Santurtzi, Ares eta Cabok. Osteguneko sailkapen nagusian bezala, Santurtzik egin du txandako markarik onena 19:08,09ko denborarekin, jarraian 6 segundo geroago bukatu dute horiek. Beraz, ohorezko txandan sailkatu dira Santurtzi, Orio, Hondarribia eta Zierbena.
Emakumezkoen lehenengo jardunaldiko sailkapena:
Arraun Lagunak: 10:31,62
Orio: 10:33,26
Donostiarra: 10:40,24
Hondarribia: 10:44,82
Tolosaldea: 10:46,68
Hibaika: 10:49,16
Deustu-Bilbo: 10:55,26
Chapela: 10:58,74
Gizonezkoen lehenengo jardunaldiko sailkapena:
Hondarribia: 19:06,86
Santurtzi: 19:08,09
Zierbena: 19:10,28
Orio: 19:14,82
Donostiarra: 19:15,42
Urdaibai: 19:23,40
Cabo: 19:32,12
Ares: 19:42,98
