Bi turismo bulegoetan 27.596 kontsulta egin dira uztailean eta abuztuan
Hondarribiko turismoak, pandemia aurreko datuak lortu ditu abuztuan, Bidasoa Bizirekek argitara eman duenez.
Abuztuaren balantze positiboa egin du Bidasoa Bizirikek. Argazkia pandemia aurretik ateratakoa da. Hondarribiko turismoak, pandemia aurreko datuak lortu ditu abuztuan, Bidasoa Bizirek-ek argitara eman duenez. Herriak %93ko hotel okupazioa izan du udako azken hilabetean, aurreko urteko abuztuarekin alderatuz 9 puntu gehiago lortu da eta aurtengo uztailarekin konparatuz, 23 puntu handiagoa izan da.
Bi turismo bulegoetan, guztira, 27.596 kontsulta egin dira, uztailean 9.376 eta abuztuan 18.220. Datuek diote, beraz, joan den urtean baino 14.000 kontsulta gehiago egin direla.
Bisitari gehienak euskaldunak, katalanak, madrildarrak eta valentziarrak izan direla jakinarazi dute, eta atzerriko turistei buruz esan dute “gutxiengoa” izan direla.
Uztailean turismo bulegoak ez zuen balantze positiboa egin, eta beraz, “oso pozik” egoteko arrazoia badutela nabarmendu du Miguel Angel Paez Bidasoa Bizirik-eko presidenteak: “Hondarribia beti izan da pertsona askok aukeratutako helmuga, baina beti dago ondo hori baieztatzea, bizi garen egoera gorabehera”.
