Sagarzazu alkatea: "Argi utzi nahi dut Hondarribian ez dela jai ekitaldirik antolatuko"
Ez da jai egitaraurik egongo baina kultur egitaraua indartu egin dute datozen egunetara begira. Kultura zinegotziak esan du "eskaintza zabala" prestatu dutela.
Gaurko agerraldian Kultura eta Berdintasun zinegotzia, Txomin Sagarzazu alkatearekin batera. Irailaren 6an hasiko ziren Hondarribiko jaiak baina beste urte batez pandemiagatik udalak ez du jai ekitaldirik baimenduko, hala esan du Txomin Sagarzazu alkateak: “Argi utzi nahi dut Hondarribian ez dela jai ekitaldirik antolatuko”.
Udalak proposatu du udako jardueren jarraipen bat egitea, baina ez izango ziren jaien egitaraua aurkeztea. Horregatik, alkateak azaldu du ez dela kale desfilerik egongo eta Botoa betetzearekin loturiko eliz ekitaldiekin bat egingo dutela.
Izan ere, Sagarzazuk udaren laburpen bat egin du eta “uda zaila” izaten ari dela uste du. Pandemiak gogor jo duela iritzi du, aste gutxitan koronabirusaren intzidentzia tasa 56tik 1000tik gora igo zelako. Hala ere, bisitari asko egon direla onartu du alkateak eta udalak jardueren programazio aldetik lan ona egin duela adierazi du.
Juan Luis Silanesek, Kultura zinegotziak esan du “eskaintza zabala” prestatu dutela eta “kontu berezia” eduki nahi izan dutela nerabeekin: “zenbait jarduera beraiengan pentsatuaz egingo baitira”.
Bestalde, Gizarte Zerbitzu eta Berdintasun zinegotzia den Gotzone Larrartek adierazi du jaiak izango ez diren arren, ‘Beldur barik’ kanpaina martxan egongo dela: “Ezinbestekoa iruditzen zaigu kanpaina hau aurrera eramatea eta bere garrantzia nabarmentzea”.
Irailaren 6 eta 10ean informazio eta kontzientziazio karpa bat jarriko dituzte, lehenik San Pedro kalean eta bigarren Kasino Zaharreko lorategietan.
Bihar, ostegunetik aurrera, ekitaldi ia guztietarako sarrerak eskuratu ahalko dira, Txomin Artolaren kontzertua eta hurrengo eguneko pilota partidetarako izan ezik. Agenda kultural osoa hemen ikusi daiteke.
