Asteburuan, hiru bandera jokatuko dira Hondarribian
Eusko Label eta KAE 2 ligetako puntuak jokatuko dira asteburuan Bidasoko uretan. Euskotren liga amaitu egin denez, igandean, lagunarteko bandera jokatuko dute Ama Guadalupekoa ontziko neskek.
Asteburu honetan estropadak izango dira Hondarribian eta hiru bandera jokatuko dira. Aurkezpena egin dute gaur, Hondarribia futbol elkartearen Hondartza zelaian, klubaren 50. urteurrenagatik. Bertan izan dira, Txomin Sagarzazu alkatea, Jose Luis Silanes Kirol zinegotzia eta Joxemi Elduaien Hondarribiko Arraun Elkarteko presidentea.
Lehenik, larunbatean, 12:00etan, KAE 2 ligako arraunlariak arituko dira lehian, Hondarribiko arrantzaleen kofradiako XV. bandera eskuratzeko. Hondarribia B-k denboraldi oso polita egin duela esan du Elduaienek, eta, uste du, larunbatean “estropada polita” egingo dutela.
Euskotren Liga joan den asteburuan amaitu zen arren, igandean, 11:40etik aurrera, lagunarteko XIII. Txingudiko bandera-Ondoan sari nagusia izango da. Hondarribiko neskak azken postuan sailkatu dira ligan, eta play-offetan jokatu beharko dute irailean: “Orain liga alde batera utziko dugu eta gero Kontxan zentratuko gara. Azkenik, play-offetan dena emango dugu” adierazi du arraun elkarteko zuzendariak.
Eusko Label ligak aurrera darrai, eta, igandean, 12:15ean hasita, Hondarribiko XXXIV bandera jokatuko da. Ama Guadalupekoa ontziak aurreko asteburuan Zarautzeko ikurrina irabazi zuen eta etxean jokatzeko “ilusioz” daudela adierazi du Elduaienek. Izan ere, sailkapen nagusian bigarren daude hondarribiarrak, eta Zarautzen abantaila atera zioten lehen postuan dagoen Santurtziri.
Bost urte daramatza Hondarribiak etxean ikurrina irabazi gabe eta “arantza” bat badutela onartu du arraun elkarteko zuzendariak: “Ea gauzak ongi egiten ditugun, ea lortzen dugun. Zortea ere beharko dugu”.
Koronabirusaren hedapena prebenitzeko neurriak hartu behar izan ditu udalak, eta hondartzako eta arrantza portuko kaiak itxita egongo dira. Hondartza, aldiz, irekita egongo da eta alkateak herritarrei eskatu die, urte eta erdian egin den ahaleginean, beste pauso bat ematea.