Asteburu arrakastatsua Santiagotarrak kirol elkartearentzat
Ur lasaiak eta ur bizietako piraguistak aritu dira lehian asteburuan Galizian eta Murtzian. Guztira 20 domina ekarri dituzte etxera.
Arsuaga ahizpak, Amundarain eta Gorrotxategi.
Joan den asteburuan, bi txapelketetan aritu zen lehian Santiagotarrak: Espainiako esprint Olinpikoko txapelketa Verducidon (Galizia) eta Espainiako gazteen eslalomeko koparen bigarren proba Calasparran (Murtzia).
Ur lasaiak
Galizian izan zen ur lasaien txapelketan, junior eta senior mailako 16 piraguistek hartu zuten parte. K1 200 metrotan Uxue Arsuagak brontzezko domina irabazi zuen, bere ahizpa Maialen bosgarrena geratu zen. Biak batera K2 ontziarekin 200 eta 500 metroko lasterketan garaile izan ziren. Ondoren, Uxue Ekaitz Aizpiolearekin batera bigarren geratu zen K2 ontziarekin kategoria mistoan.
K4 ontziarekin 500 metroko lasterketa irabazi zuten Arsuaga ahizpek, Irene Gorrotxategi eta Eider Amundarainek. 1000 metroko lasterketan ere aritu zen Amundarain eta zilarrezko domina irabazi zuen, baita urrezko domina ere K2 ontzian Gorrotxategirekin.
Senior kategoriari dagokionez, Nerea Garciak lau domina irabazi zituen K1 ontziarekin. 200 eta 500 metroko sub20 modalitatean lehenengo postuan geratu zen, 200m sub23 modalitatean bigarren eta 500m sub23 hirugarren.
Aitor Gorrotxategik brontzezko bi domina eskuratu zituen, 500m eta 1000m sub23 kategorietan. Gero, K2 ontziarekin atera zen Eneko Egigurenekin 1000 metro egitera eta hirugarren postuan geratu ziren.
Ur biziak
Segura ibaian jokatu zuten txapelketa ur bizietako piraguistek. Taldekako sailkapenean lehenengo postua irabazi zuen Santiagotarrak kirol elkarteak. Asteburu honetan Lleidako Sort herrian izango da ur biziko eslalomeko Espainiako txapelketa.
Hasi berrien C1 eta K1 kategorian, bina urrezko domina irabazi zituzten Izar Garciak eta Aitor Iriondok. Zilarrezko domina lortu zuen Javier Arruabarrenak C1 kategorian, eta brontzea Telmo Otegik.
