Bost lagun atxilotu dituzte Irunen droga trafikoa leporatuta
Bi kilo eta erdi kokaina, kilo bat haxix eta 233.000 euro atzeman ditu Espainiako Poliziak operazioan; taldeak Irunen, Hondarribian eta Hendaian saltzen zutela droga zabaldu dute ikerketa iturriek.
Espainiako Poliziak bost lagun atxilotu zituen Irunen hilaren 13an droga trafikoa eta talde kriminal baten parte izatea leporatuta, atzo Europa Press albiste agentziak ezagutarazi zuenez. Atxiloketak egiteko abiatutako dispositiboan hainbat etxebizitza eta auto miatu zituen poliziak. Zabaldutako informazioaren arabera, bi kilo eta erdi kokaina, kilo bat haxix, 233.000 euro, aire konprimatu pistola bat, eta droga manipulatzeko eta eraldatzeko tresneria atzeman zituzten agenteek miaketetan. Irunen, Hendaian eta Hondarribian saltzen zituztela sustantzia horiek erantsi dute.
Ikerketa iaz abiatu zuen Espainiako Poliziak. Izan ere, Ipar Euskal Herritik Behe Bidasoa eskualdera ustez estupefazienteak erostera gerturatu ziren hainbat herritar atzeman zituzten agenteek. Zabaldutako datuen arabera, ikerketa abiatuta bost lagunek gidatutako taldea zela jakin zuten, horietako batek liderraren rola betetzen zuelarik. Hala, taldekide batzuk «erosleak bilatzeaz» arduratzen zirela, eta beste batzuk «poliziaren jarraipena ekiditeko zaintza lanak» egiten zituztela adierazi dute ikerketa iturriek.
Bost atxilotuak Irungo Instrukzio Epaitegitik pasa dira. Hiru akusatu zuzenean bidali ditu epaileak espetxera.
