Gizarte zerbitzuen zitetara laguntzeko "zailtasunak" salatu ditu Korapilatuzek
Pertsona boluntarioek zaurgarritasun egoeran dauden pertsonei gizarte zerbitzuen zitetara laguntzea eskubide bat dela gogorarazi du kolektiboak.
Laguntza Korapilatuz Bitartekotzarako Erakunde eta Profesionalen Espazio Irekiak gizarte zerbitzuen zitetara laguntzaile gisa joateko hainbat entitate eta kolektibotako boluntarioek dituzten zailtasunak salatu ditu. Horretarako, Gizarte Zerbitzuek jartzen duten argudio nagusia Datuen Babeserako Legea dela adierazi du kolektiboak, baina aitzakia moduan erabiltzen dutela kritikatu du: “Ez da bidezkoa”. Are gehiago, lagunduta joatearena “eskubide bat” dela gogorarazi du.
“Inori ez litzaioke bururatuko ezin duela medikura joan lagundu gabe, eta zergatik, ordea, hori egin liteke gizarte zerbitzuetan?”, galdetu du Korapilatuzek. Etxegabetze batean banketxe bateko zuzendariak gizarte zerbitzuetan baino traba gutxiago jarri dizkiela adierazi du.
Horrez gain, irtenbiderik ez dietela eman esan du; esaterako, legeak [Datuen Babeserakoak] zehazten duen baimen garbia eta idatzizkoa, “nahiz eta legeak berak erreklamatzen duen ideologia, sindikatu afiliazioa, erlijioa eta fedea bezalako kasuetan, eta ez aipatzen ari garenen kasuan”, gaineratu du. Hori, ordea, aitzakia bat besterik ez da Korapilatuzentzat, pertsona batzuek zaurgarritasun egoeran dauden beste batzuei ez laguntzeko”. Horrek, “erantzun bat behar duten pertsonak” kaltetzen dituela salatu du.
Pertsona guztiek eduki beharko lukete lagunduta joateko eskubidea, baina are gehiago osasunez ondo ez badaude, helduak badira edo hizkuntza ulertzeko zailtasunak badituzte”. Gainera, informazioa idatziz ematea eskatu dute.
Telefonozko zitak ere jarri ditu jomugan, askotan “komunikazio jarraia” izateko dituen mugak direla eta, “egoera hau ez da ulergarria, ezta COVIDarengatik ere”. Horrez gain, ihesbideak erabiltzen dituztela kritikatu du zitetara ez laguntzeko, esaterako, zita telefonikoak egunez aldatuz.
Pertsonen zaintzarako “praktika egokiak eta tratu ona” erabili behar direla esan du Korapilatuzek, eta are gehiago “zaurgarritasun egoeran dauden pertsonak” joaten direnean, eta gai horiek kudeatzea “oso zaila” egiten zaienean.
