Euskarazko 10.000 liburu jaso ditu CBA liburutegiak
Irungo Udalak jakinarazi duenez, La Salleko Anaiak kongregazioak eman dizkio, eta publikazio bilduma horrek askotariko jakintza adarrak biltzen ditu.
Irungo La Salle Anaiek 10.000 liburu eman dizkiote udalari. La Salle Anaiak kongregazioak 10.000 liburutako dohaintza bat egin dio CBA udal liburutegiari. Irungo Udarak arabera, liburu horiek askotariko jakintza adarrak lantzen dituzte, baina hari bat dute: euskara.
Hain zuzen, La Salle Anaiek Irungo egoitzan zuten euskarazko funts bibliografikoaren barruko argitalpen sorta bat da. Udalak gaineratu duenez, argitalpen sortaren zati bat bertako eta Bidasoko esparru geografikoarekin lotuta dago.
Juncal Eizagirre Kultura zinegotziak eskerrak eman dizkie La Salle Anaiei dohaintzarengatik “hiriko kulturari eta jakintza esparruari egindako ekarpenenarengatik”. Horrez gain, gogorarazi du liburutegiaren euskarazko dokumentuen katalogoa handituko dutela, “oso nabarmenki handitu ere”.
La Salleko Anaiek Hiriaren Urrezko Domina jaso zuten 2006ko abenduan.
