'Lokatza, historiaren zaindari' erakusketa, bihartik ikusgai
Gipuzkoan eta Gijonen aurkitutako eta lokatzari esker kontserbatutako hainbat objektu egongo dira ikusgai Oiasso museoan.
Bihartik (hilak 18), erakusketa berri batez gozatzeko aukera izango dute irundarrek Oiasso Erromatar Museoan. Izan ere, Lokatza, historiaren zaindari izeneko erakusketak hartuko du eraikina, museoaren, Gijongo (Asturias) Arkeologia Museoen eta Gordailuaren arteko elkarlanaren ondorioz.
Gipuzkoan eta Gijonen aurkitutako eta lokatzari esker kontserbatutako hainbat objektu egongo dira ikusgai. Denboran kapsulatutako eta baldintza berezietan kontserbatutako piezak jarri dituzte, askotarikoak. Material organikoz egindakoak, zurez, larruz, artilez…
Erakusketaren helburuetako bat da “ikerketa lanaren garrantzia nabarmentzea, aztarnategietako lanarena, baita katalogazioarena ere”.
“Erakusketari esker gure iraganeko bide luze bat egiteko aukera izango dugu”, diote udaleko iturriek. Izan ere, Oiasso inguruko pieza erromatarrak bildu dituzte erakusketan, I. eta II. mendeetakoak, baita ere Gijongo tabako fabrika depositu putzu batean egindako indusketetan berreskuratutako VI. eta VII. mendera bitarteko objektuak.
Sarrera doakoa izango da, eta museoaren ohiko ordutegian bisitatu ahal izango da, hau da, asteartetik larunbatera 10:00etatik 20:00etara eta igande eta jai egunetan aldiz, 10:00etatik 14:00etara.
