Dagoeneko Irungo 17 establezimenduk eskuratu dute 'Singular dendak' bereizgarria
Chocolates Irun izan da bereizgarria eskuratzen azkena. "Aurrea egiteko bultzada bat da eta ilusioz betetzen gaitu", esan dute dendakoek.
Irunen gero eta establezimendu gehiago dira ‘Singular dendak’ bereizgarria dutenak. Dagoeneko hiriko hamazazpi establezimenduk lortu dute bereizgarri hori, atzo bertan eman zuen datu hori Jose Antonio Santano alkateak. Azkena atzo iritsi zen, Chocolates Irun-ek jaso zuen.
“Azkenaldia zaila izan da sektorearentzat, eta horregatik, are gehiago, gure bertako saltokietan erosi behar dugu. Bizitasuna ematen diote hiriari, eta , denon artean, gure aletxoa jarri behar dugu. Horrelako bereizgarriak oso garrantzitsuak dira, gure dendek etengabeko hobekuntzaren alde egiten duten lanaren froga baitira. Gure merkataritza erakargarria da, eta berrikuntzaren alde egiten du; kasu honetan, Irunek oso berezkoa duen produktu batekin, txokolatearekin”, esan du Jose Antonio Santano alkateak.
Programan helburua Gipuzkoan balio bereizgarriren bat duten saltokiak nabarmentzea da. Horretarako, azken urteetan saltokien jardunaren hainbat ildo sendotzeko jarduerak antolatu ditu Gipuzkoako Merkatarien Federazioak, hala nola produktuaren, komunikazioaren edota marketinaren balioa nabarmentzekoak.
Chocolates Irun establezimenduko kideak oso pozik azaldu dira jasotako bereizgarriarekin: “Aurrea egiteko bultzada bat da eta ilusioz betetzen gaitu”, esan dute.
