Brioche Pasquier Recondoko langileek borrokan jarraitzen dute
Igandean, San Juan plazan, elkarretaratzea egingo dute Azken Portuko lantegiaren itxiera salatu eta langileen subrogazioa eskatzeko.
Azken Portuko Recondo-Pasquier lantegia Brioche Pasquier Recondoren lantegia tantaka-tantaka husten ari dira, eta langileen egoerak konpondu gabe jarraitzen duela salatu dute sindikatuek. Hori dela eta, igande honetan, 11:30ean, elkarretaratzea egingo dute San Juan plazan.
Jon Urkola ELA sindikatuko ordezkariak azaldu duenez, enpresa banan-banan negoziatzen ari da langileekin, batetik, kaleratze boluntarioak, eta, bestetik, Landetxeko lantegirako trasladoa. Hasteko, horrek langileak mahaian esertzerakoan aurkitzen diren egoera zaurgarria salatu du.
Kaleratze boluntarioak erretiro aurreratu moduan planteatu arren, praktikan, kaleratzeak direla argi utzi du Urkolak, eta ordainsari baten truke kalean geratzen direla, eta ahal dutenean erretiroa hartuko dutela.
Trasladoak, berriz, baldintza berezietan ematen direla adierazi du ELAko ordezkariak. Bulegoko langileei bakarrik mantendu dizkiete Azken Portuko plantan zituzten lan baldintzak, eta produkzioan daudenak, berriz, “baja boluntario bat” sinatu behar dute, eta berriro “zerotik” hasi, antzinatasuna eta bestelako eskubideak bidean galduz. Horientzako subrogazioa eskatu dute sindikatuek.
Horrez gain, enpresaren gardentasun eza ere kritikatu du Urkolak, negoziazioak bakarka eginda, ez dakitelako dagoeneko zenbat langile kaleratu dituzten. Edozein modutan, antzinatasun gehien dutenak paretik kendu nahi dituztela esan du: “Norbait negoziazioarekin ados badago, primeran, baina enpresak ezin ditu denak berdin presionatu”. Urkolak iritzi dio bi plantak fusionatu arren, denentzako lana izango dela Landetxako lantegian.
