Erbesteratuak omentzeko kolaboraziora deitu dituzte hondarribiarrak
36ko gerraren eta Frankismoaren ondorioz erbesteratuen inguruko irudiak, gutunak eta agiriak bildu nahi ditu udalak; abuztuaren 30etik aurrera zabalduko dute erbesteratuen omenezko erakusketa.
Erbesteratuak omentzeko iniziatiba aurkeztu du udalak. 
Bizikidetza Batzordea osatzen duten udal talde guztien adostasunarekin erbesteratuak omentzeko iniziatiba abiatu du Hondarribiko Udalak. 36ko gerraren eta Frankismoaren ondorioz erbesteratutako hondarribiarrak erakusketa batean bildu nahi dituzte horretarako EAJk, Abotsanitzek, EH Bilduk eta PSE-EEk. Horrez gain, ekitaldia burutuko dutela kai zaharrean eta ikus-entzunezko bat ere osatzen ari direla aurreratu dute hautetsiek.
Maria Serrano (EAJ), Aitzol Arroyo (Abotsanitz) eta Iosu Alvarez (PSE-EE) ordezkariek eman dute iniziatibaren berri gaur, udaletxeko areto nagusian egindako agerraldian. EH Bilduko Xabier Isasi bozeramaileak, bere aldetik, agenda arazoak medio ezin izan du prentsa aurrekoan parte hartu.
“Maiatzaren 8an 36ko gerraren eta diktaduraren ondorioz erbesteratutako bikitimak oroitzeko eta omentzeko eguna izan zen”, adierazi dute. Abuztuaren 30ean, bestalde, desagerpen behartuen nazioarteko eguna ospatuko da, eta “bi data horiek oinarritzat hartuta, Hondarribiko Udalak gertakizun horien inguruko gogoeta sustatu nahi du aurten, 36ko gerraren hasieraren 85. urteurrena beteko dela kontuan izanik”.
Erakusketa burutu ahal izateko, hala ere, hondarribiarren kolaborazioa eskatu du udalak. Irudiak, gutunak, objkektuak eta agiriak bildu nahi ditu horretarako, eta material hori maileguan utz diezaioten galdegin die herritarrei: “Garai hura gogorarazteko elementuen bila gabiltza, erakusketa ahalik eta aberats eta hurbilena antolatzeko”.
Giza eskubide urraketak, gogoan
Alvarezek zabaldutako datuen arabera, hondarribiarren %65ak erbesterako bidea hartu zuen Espainiako gerra eta ondoko diktaduraren ondorioz. Areago, Irungo sutea funtsezkoa izan zela despalazamendua eragiteko erantsi du. Arroyok, hala ere, zifra hori altuagoa izan daitekeela aditzera eman du: “%75 ere izan daitekeela esango nuke. 4.000 itzultze fitxa baino gehiago daude, eta 1936-1937ko errolda kontuan izanda, oso nabarmena izan zen, nahiz eta zenbakia jakitea oso zaila den”.
Serranok bere aldetik esan duenez, “giza eskubideen urraketak ezagutu nahi dira. Hondarribiarren bizipenetara eta edukitako ondorioetara hurbildu nahiko genuke, eta bide batez, egoera horiek pairatu izan zituzten hondarribiarrei merezitako aitortza egin”.
Hori horrela, erakusketan parte hartu nahi duten lagunei dei egin diete hautetsiek. Objektu, argazki, irudi eta gutunak bildu nahi dituzte eta 685 72 00 32 telefono zenbakia ahalbidetu dute horretan parte hartu nahi duten herritarrentzako.
