25. urteurrena gogoan, liburuxka atera du Alarde Publikoak
Aurten 25 urte beteko dira emakume talde bat alardean sartu zenetik, eta hori gogoratzeko, etxez etxe liburuxka bat banatuko dute, alardean bildutako argazkiekin.
San Martzial Eguna ate joka dugu, baina, aurten, iaz bezala, pandemiaren eraginez, ez da alarderik izango. Duela 25 urte, ordea, izan zen alardea, emakumeek parte hartu zuten lehena, hain zuzen, eta pandemiak urteurrenaren ospakizuna zapuztu duen arren, Alarde Publikoak liburuxka bat atera du hura gogoratzeko.
Liburuxka etxez etxe banatuko du Alarde Publikoak. Horrez gain, alardepublikoa.eus webgunean ere deskargatu ahal izango da, eta sare sozialetara ere irudi gehiago igoko ditu.
Hain zuzen, 2021ean 25 urte beteko dira emakume talde batek udalari alardearen ordenantza aldatzeko eskatu zionetik, emakumeen berdintasunezko partaidetza bideratzeko. Udalaren ezezkoaren ondotik, emakume talde hori ez zen besoak gurutzatuta geratu, eta urte arteko alardean bertan emakume eta gizon talde bat sartu zen desfilean emakumeek herriko jaien ekitaldirik garrantzitsuenetan parte hartzeko duten eskubidea aldarrikatu eta plazaratzeko.
Urte horietan guztietan “harro” egoteko alardea eraiki dutela adierazi du Alarde Publikoak, eta “berdintasuna nortasun ikurtzat” duten emakume eta gizon guztiek bere egin dutela. Hori aldarrikapena planteatzera ausartu ziren emakumeei esker izan dela adierazi du, “duintasunez eta adorez” eutsi ziotelako egoera horri.
Lagun izan dituzten gizonak eta barrutik nahiz espaloietatik poliki-poliki batu eta babesa eman dieten guztiak ere kontuan izan ditu Alarde Publikoak, baita senide eta adiskideak ere.
Ekinaren ekinez, alardea handituz joan dela azaldu du, eta, orain, milaka lagun batzen dituen “amets honetara” iritsi direla nabarmendu du. Edozein modutan, “etorkizun ez urrutikoan” alarde bakarra izateko itxaropena duela gaineratu du, “udalak herritar ororentzako antolatutako alardea”.
2021ean alarderik izango ez den arren, 2022koa prestatzeari “are gogotsuago eta saiatuago” ekingo diotela adierazi du Alarde Publikoak.
Pandemia izan da aurtengo alardea ez ospatzeko arrazoia, eta liburuxkan, hain zuzen, COVID-19aren kalteak gehien pairatu dituztenak izan dituzte gogoan. Horiei elkartasun mezu bat igortzeaz gainera, eskerrak eman dizkie lehen lerroan aritu diren guztiei.