Ingurumenaren Eguna ospatuko dute Artiako Lagunek, aldarrikapen egun batekin
Larunbatean Pasquier-Recondo enpresaren inguruan udalak aurreikusi duen hirigintza plana salatuko dute eta lurzorua birnaturalizatzeko eskatuko diote udal gobernuari.
Datorren ekainaren 5ean (larunbata da) Artiako Lagunek Ingurumenaren Nazioarteko Eguna ospatuko dute, nola ez, aldarrikapen egun batekin. Bidasoaldeko Lagunekin batera antolatu dute larunbatekoa, Bir-irudikatu. Bir-naturalizatu lemapean.
Azken asteotako borrokari jarraipena emango diote, gogor salatuko baitute Pasquier-Recondoko hiri plangintza, eta lurzoru birnaturalizatzeko eskatuko diote udal gobernuari. Ondorengoa da larunbaterako antolatu duten programa:
- 11:30: Bizitzaren Zuhaitza landatuko dute Recondo enpresaren inguruan, «ingurua birnaturalizatzeko potentziala aldarrikatzeko».
- 12:00: elkarretaratzea egingo dute. Bertan, Xabier Garate SEO Birdlife-Bidasoaldeko Lagunakeko ornitologoak Txingudiko badiaren garrantzi ekologikoaz, hegazti faunaz eta Natura 2000 Sareak babestutako ekosistemaz
ariko da; Hilario Manzanedo biologoak naturaren berreskurapenari buruz ariko da; eta Pasquier enpresako langile batek langileen lan egoeraz mintzatuko da.
«Artia Hirigintza Basatiaren ondorioa da, asfaltozko ibaiak eta hormigoizko mendiak dituena. Hiriguneek biziberritzeko ahalmen handia dutela aldarrikatu nahi dugu. Ingurumenaren nazioarteko egun honek Nazio Batuen Ekosistemen berreskuratzeko Hamarkadaren hasiera markatuko du, basoak, ibaiak eta hiriak berpizteko, bioaniztasuna lehengoratzeko eta basoberritzeko misio globala», esan dute Artiako Lagunek.
