[Galeria] Lore eskaintza, Poeta eta Morikoren omenez
Asturiagako segadatik 47 urte bete ziren atzo; gertatutakoa argitzeko eta biktimak omentzeko ekitaldia burutu zuen Asturiaga 1974 memoria taldeak.
Moriko eta Poeta erail zituztela 47 urte bete ziren atzo. 
1974ko maiatzaren 20an erail zituzten Espainiako indar polizialek Roke Xabier Mendez Villada Poeta eta Jose Luis Mondragon Elortza Moriko iheslariak Asturiagako hondartzan. 47 urteren ondoren argitzeke jarraitzen du frankismoaren bukaeran erregimenak burututako hilketa honen nondik norakoak.
Atzo, urtero bezala, ustez gertatutakoaren errepasoa egin zuten fraideen hondartzan bildutakoek, baita kasua zertan dagoen gaur egun argitu ere. Horrekin batera, ikerketak aurrera egin dezan Hondarribiko Udalbatzak onartutako mozioaren nondik norakoak ere hizpide izan zituen Xabi Bengoetxea memoria taldeko kideak. Kepa Ordoki Memoria Historikoa Bidasoan elkarteak bat egin zuen deialdiarekin.
Omenaldi xumea baina hunkigarria izan zen atzokoa. Bertan bildutakoek lorez bete zituzten Moriko eta Poetaren argazkiak, eta beste behin ere, beste urte batez, egia, justizia eta erreparazioa aldarrikatu zituzten indar polizialen biktima guztientzat.
Ondokoa da omenaldiak utzitako irudi sorta.
