Chillida Lekuk, Topic museoak eta Oiassok indarrak batu dituzte
Hilaren 18ko (asteartea da) Museoen Nazioarteko Egunaren harira, azken urteotako ospakizunik handiena antolatu dute hiru museoek elkarlanean. Bi jarduera nagusi antolatu dituzte.
Oiasso Erromatar Museoa. Datorren hilaren 18a (asteartea da) Museoen Nazioarteko Eguna da, eta egun berezirako indarrak batzeko apustua egin dute Irungo Oiasso Erromatar Museoak, Chillida Lekuk eta Topic museoak. Hiruen artean azken urteotako ospakizunik handiena egingo dutela iragarri dute.
Ondorengoak dira, museoen egunaren harira aurreikusi dituzten jarduerak:
- Aniztasunaren Gala: Hilaren 14an, Oiasson izango da; hilaren 15ean, Topic zentroan (Tolosan); eta hilaren 16an, Chillida Leku museoan. Musika eta dantza emanaldien bidez, arteak mugarik ez duela frogatuko dute. Gala honetan, Iñaki Salvador, Jakes Txapartegi, Simon Ezquiaga, Telmo Irureta eta The Dancer telebista saio ezagunean arrakasta handia izan duen Verdini Dantza Taldeko kideak ariko dira. Galaren sarrerak 5 euroan eskura daitezke, eta hiru museoetan salduko dituzte.
-
Pieza Bihurriak: Familiek museo bakoitzean ezkutatutako hiru objektu bilatzeko jarduera bat egingo dute. Aurkitzen dituzten piezen argazkiak sare sozialetara igo beharko dituzte eta hiru museoetako objektu guztiak aurkitzen dituztenek sariak irabaziko dituzte. Hilaren18an hasiko da jokoa, egun horretan Oiassoko sarrera doakoa dela probestuz. Irailaren 30era bitarte iraungo du jolasak.
