Enpleguaren Asteko elkarrizketak hilaren 27an egingo dituzte
Pandemiara egokitutako ekitaldia izango da aurtengoa, hori dela eta, Internet bidez eman beharko dute izena lan-eskaintzetan hautagaiek.
Enpleguaren astea
XXV. Enpleguaren Astearen nondik norakoak aurkeztu dituzte gaur goizean Bidasoa Bizirik-eko Miguel Angel Paez presidenteak eta Maria Serrano presidenteordeak Ficoban egindako agerraldian. Azaldu dutenez, hilaren 27rako deituko dituzte lan elkarrizketak, soilik egokiak izan daitezkeen hautagaiekin, aldez aurretiko hitzordua emanda.
Pandemiara egokitutako edizioa izango da aurtengoa. Hortaz, lan-eskaintzak garapen agentziaren webgunean kontsulta ditzakete interesdunek, eta horren bitartez eman beharko dute izena. Hilaren 20ra arte egongo dira zabalik, nahiz eta “hautagai egokien zerrenda kupoa” data horren aurretik beteko balitz eskaintza bertan behera geratuko litzatekeen.
Ordezkariek gaineratu dutenez, Irunen eta Hondarribian erroldatutako hautagaiek izango dute lehentasuna, eta beraz, datu guztiak egiaztatuko dituztela zehaztu dute.
Azkenik, enpresez gain, Behe Bidasoko ikasketa zentroek eta hirugarren sektoreko hainbat erakundek euren espezialitateen inguruko informazioa eskainiko dute (matrikulak, azpiegiturak, irteera profesionalak), aldez aurretik hitzordua eskatuta beti ere. Atzerriko titulazioen homologazioari buruzko aholkuaritza ere emango dutela bukatu dute.
