Migratzaile gutxiago iritsi dira azken egunotan Irunera
Irungo inbutua arindu da, neurri batean, migratzaile gutxiago etorri eta pertsona gehiagok lortu dutelako muga zeharkatzea, azken astean.
Hendaia Irundik. Eskuinean, Ferrokarrilaren zubia. Irunen sortzen ari zen inbutua arindu da azken egunotan, batetik, espero baino migratzaile gutxiago iritsi direlako hirira, eta, bestetik, aurreko asteetan baino pertsona gehiagok lortu dutelako muga zeharkatzea; astebetean, 50-60 inguruk Irungo Harrera Sarearen arabera.
Neurri batean, harrera sarea “harrituta” agertu da Josune Mendigutxia kidearen arabera, kontuan hartuta, Kanaria Uhartetik penintsulara geroz eta jende gehiago bidaltzen ari direla: “Agian sortu den alarma eta gero, estatuko beste toki batzuetan gelditu dituzte”. Edozein modutan, hurrengo kolperako prest egon behar dutela ohartarazi du harrera sareko kideak, eta lehenago edo beranduago etorriko dela.
Asteburuan Irun eta Hondarribian dituzten dispositiboak ez direla bete azaldu du Mendigutxiak. Ostiralean, 60 lagun iritsi ziren, eta, larunbatean, 30. Gautxoriek, bestalde, bi lagun artatu dituzte. Edozein modutan, migratzaileak egoera tamalgarrian iristen direla salatu du harrera sareko kideak: “Irunera iritsi aurretik, hiru egun pasatzen dituzte estatuan jan gabe, lo egin gabe… Kristo eginak iristen dira”.
Instituzioek “jarrera ona”
Hurrengo asteei begira, zer gertatuko den zain daudela adierazi du boluntarioak: “Instituzioen aldetik mugitzen ari dira, eta gurekin ere harremanetan jarri dira, eta hala jarraitu nahi dute. Oro har, jarrera ona da, baina ikusiko dugu nola doan”. Hala ere, Eusko Jaurlaritza bai, baina oraindik Irungo Udala ez dela beraiekin harremanetan jarri kritikatu du Mendigutxiak: “Joan den larunbatean Hilanderaseko aterpetxean izan ginen. Gurutze Gorriko jendea zegoen, Eusko Jaurlaritzakoa… baina ez zegoen udaleko inor”.
Irun eta Hondarribia artean, ia 200 ohe dituzte momentu honetan. Ez dakite noiz arte jarraituko duten dispositibo horrekin, baina Mendigutxiaren iritziz, migratzaile oldea espero dutelako jarri dituzte, baita mugan kontrol handiak izango direlako ere.
200 ohe horietara iritsi ziren joan den astean Hondarribiko Udalak Jostaldi pilotalekuan 96 ohe ipini ondoren. Harrera sareari ongi iruditu zaio toki berri bat prestatzea, baina kokalekua egokia ez dela gogorarazi du, “atzeraka joatea” dela: “Migratzaileek pasatzen dute egun osoa muga zeharkatzen saiatzen, eta Hondarribitik ezin dute hori egin. Irunen badira nahikoa toki horretarako, Urantzu frontoia edo Ficoba bera esaterako”. Harrera sareak hori lortzeko lanean jarraituko duela berretsi du.
