Elkarrekin Podemos: "Udal gobernu plural baten alde lan egiteko konpromisoa dugu"
Koalizio morearen arabera, alderdi politikoen arteko elkar ulertzea lortu dute, eta oposizioaren 30 zuzenketa sartu dituzte.
Taldeko ordezkari Miren Etxebeste, agerraldi batean. Elkarrekin Podemosek balorazio positiboa egin du joan den astearteko aurrekontuen onarpenaz: “Oposizioaren babesa izan du, ez baitu kontrako botorik jaso”. Abenduan gobernuan sartu izanak aurrekontuak baldintzatu dituela iritzi dio, eta, zentzu horretan, aurrekontu “hedagarriak, sozialak eta partaidetzakoak” onartu direla. “Nahiz eta ezin dugun aurrekontua % 100ean diseinatu, erronka handiak lortu ditugu, hala nola, hainbat indar politiko elkar ulertaraztea”, adierazi du. Ildo horretatik, oposizioaren 30 zuzenketa sartu zirela azaldu du, milioi bat euroko balioarekin. Aurrera begira ere, “gehiengo sozialen alde eta udal gobernu plural baten” alde lan egiteko konpromisoa agertu du.
Aurrekontuei dagokionez, hainbat “funtsezko mugarri” aipatu ditu Elkarrekin Podemosek: Irunen historian izandako inbertsiorik handiena egingo dela ingurumen politiketan, etxebizitza-politika sustatuko dela alokairuko sustapen publikoetarako garapen berriekin, eta gizarte ongizatea blindatu eta indartuko dela, gizarte larrialdietarako etxebizitzen kopurua %30ean handituz eta baliabideak handitzen jarraitzeko konpromisoarekin.
Berdintasunaren arloan, Emakumeen Etxea proiektuari helduko zaiola esan du, eta dagoeneko baduela kokalekua. Kontziliazioaren arloan, berriz, haurtxokoen plazak handituko direla gogorarazi du.
“Osasun, gizarte eta ekonomia krisi honen testuinguruan onartu ditu koalizio gobernuak lehen aurrekontuak, eta horrek erakusten du ahaleginarekin eta gogoarekin beste politika mota batzuk egin daitezkeela”, ondorioztatu du koalizio moreak.
