«Kalitatezko zaintza sistema publikoa» aldarrikatuko dute ostegunean
LAB, ELA, CCOO eta ESK sindikatuek deitutako greba babestu dute Sortuk eta Bidasoko Eskubide Sozialen Kartak, eta kalera ateratzeko deia egin diete bidasoarrei. Ostegunean mobilizatuko dira, Zabaltza plazan.
Bidasoko Eskubide Sozialen Kartak eta Irungo Sortuk ostegunean (hilak 4) mobilizatzera deitu ditu irundarrak, LAB, ELA, CCOO eta ESK sindikatuek Gizarte Zerbitzuetan deitutako mobilizazioaren bat egiteko. Zehazki, adineko zentroetako langileak, aniztasun funtzionalaren eremuan lan egiten dutenak, esku-hartze sozialeko langileak, adin txikiko zentroetakoak, etxeko langileak edota etxez etxeko laguntza ematen duten langileekin aldarrikapenekin bat egingo dute. Zabaltza plazan bilduko dira, 19:00etan.
Ostegunerako deialdia txalotu nahi izan du Irungo Sortuk, hedabideei bidalitako ohar baten bitartez. Haien arabera, pandemiak bi errealitate agerian utzi dituela uste dut. Batetik, «gizarte zerbitzuek bizitza mantentzeko duten garrantzia eta langile guztiek egiten duten funtsezko zaintza funtzioa», eta bestetik, «zaintzaren funtzioa eta gizarte/zaintza zerbitzuen ahuleziak ez direla aintzat hartzen».
Horregatik, gizarte zerbitzuen publifikazioaren alde egin du Sortuk, eta hauen kalitatea ziurtatzeko neurriak aldarrikatu ditu. Zaintza sistema publiko, unibertsal eta doakoa eraikitzea beharrezkotzat jo dute, esparru sindikaletik ez ezik, arlo politiko eta sozialetik ere bultzatu beharrekoa baita haien ustez.
Hala, bidasoar oro mobilizatzera deitu du Sortuk, «lan banaketa injustu, esplotatzaile eta prekarizatzaileak eragiten duen sistema kapitalista patriarkalaren aurrean» mobilizatzera.
