«Irundarron bizi baldintzak hobetzeko» proposamen gehiago egin ditu EH Bilduk
2021eko aurrekontuei begira zenbait proposamen berri egin ditu koalizio subiranistak, «pertsonak politika publikoen erdigunean jartzeko» asmoz.
Unanue, Briones eta Melida, gaurko agerraldian. Irungo EH Bilduko Jokin Melida, Oihana Briones eta Ane Unanue kideek agerraldia eskaini dute gaur udaletxean. Bertan, 2021ko udal aurrekontuei begira urte hasieran taldeak aurkeztutako oinarrizko proposamenak zeintzuk diren gogoratu dituzte lehenik, eta bereziki, udal gobernuari bidalitako azken proposamenen gaineko xehetasunak eman dituzte.
Udal zerbitzuen deszentralizaziorako bidean, hiriko auzoetan bulegoak sortzea proposatu zuten lehenik urtarrilean, «beharrak dituztenengana gerturatzeko asmoz». Honetarako, 1,5 milioi euroko diru partida bat proposatu zuen koalizio subiranistak. Aipatutako bulego hauek gizarte zerbitzuetako unitate bat eta HAZeko beste unitate bat izango lukete.
Bestalde, hiriko eremu degradatuak biziberritzeko bi milioi euroko partida bat ere proposatu zuen taldeak urtarrilean.
Azkenik, berraktibazio soziekonomikorazo plan bat jarri zuen EH Bilduk mahai gainean urte hasieran, autonomo, enpresa txiki, ostalari eta merkatariei bideratua, «aurreko diru laguntzetatik kanpo geratu diren zerbitzuetara iristeko».
Orain aldiz, proposamen gehiago egin ditu koalizioak, «pertsonak politika publikoen erdigunean jartzeko, eta irundarron bizi baldintzak hobetzeko». Taldeko kideen arabera, datozen egunetan ikusiko dute negoziazioek zer ematen duten. Ondorengoak dira proposamenak:
- ZUBIAko plaza kopurua handitzea (200.000 euro), taldekoen arabera «motz» geratu baita egun dauden behar guztiei aurre egiteko. 20 plaza berri irekitzea proposatu dute.
- Tailer okupazionalak gizarte bazterketan daudenentzat (120.000 euro), «gizarte bazterketa egoeretan dauden pertsonen bizi baldintzak hobetzeko asmoz».
- Babesgabetasun egoeratan dauden haurren esku hartze goiztiarrerako programa bat egitea (95.000 euro), «haurren babesgabetasun egoerak modu goiztiarren atzemateko», bertan esku hartzeko programa bat sortuz.
- Irungo auzoen azterketa soziologikoa egitea (50.000 euro), «auzoen egoerak eta auzoek dituzten beharrak hobeto ezagutzeko».
- Bidasoa-Txingudi mugaz gaindiko partzuergoaren aurrekontua handitzea (50.000 euro), «eskualdeko estrategia garatzeko, eta Irun, Hondarribia eta Hendaiako udalen arteko harremanak indartzeko».
